၁ သင်တို့သည် သင်တို့ ဘုရားသခင် ထာဝရဘုရား၏သား ဖြစ်ကြ၏။ သေသောသူအတွက် အသားကို မခုတ်မရှရ။ မျက်မှောင်ကြားမှာ အမွေးကို မရိတ်ရ။ ၂ သင်တို့သည် သင်တို့၏ ဘုရားသခင် ထာဝရဘုရားအဖို့၊ သန့်ရှင်းသော လူမျိုးဖြစ်ကြ၏။ [A] ထာဝရဘုရားသည် မြေကြီးပေါ်မှာ ရှိသမျှသော လူမျိုးထက်၊ ကိုယ်တော် ပိုင်ထိုက်သော အမျိုးဖြစ်စေခြင်းငှာ သင်တို့ကို ရွေးချယ်တော်မူပြီ။ ၃ စက်ဆုပ် ရွံရှာဘွယ်သော အရာကို သင်တို့မစားရ၊ ၄ စားရသော တိရစ္ဆာန်ဟူမူကား၊ နွား၊ သိုး၊ ဆိတ်၊ ၅ သမင်၊ ဒရယ်၊ ဆတ်၊ ဂျီ၊ ဒိရှုန်၊ စိုင်၊ ဇမေရ အစရှိသော၊ ၆ ခွာကွဲပြား၍ စားမြုံ့ပြန်သော သားများကို စားရသော အခွင့်ရှိ၏။

စားမြုံ့မပြန်၊ ခွါမကွဲ၊ အယပ်အကြေးမရှိသော သားများမစားရ

၇ သို့သော်လည်း စားမြုံ့ပြန်သောသား၊ ခွါကွဲပြားသော သားတို့တွင် မစားရသောသား ဟူမူကား၊ ကုလားအုပ်၊ အာရနဘက်၊ ရှာဖန်တို့သည် စားမြုံ့ပြန်သော်လည်း၊ ခွာမကွဲပြားသောကြောင့် သင်တို့၌ မစင်ကြယ်။ ၈ ဝက်သည် ခွါကွဲပြားသော်လည်း၊ စားမြုံ မပြန်သောကြောင့်၊ သင်တို့၌ မစင်ကြယ်။ အသားကို မစားရ။ အသေကောင်ကိုလည်း မထိရ။ ၉ ရေ၌ နေသော တိရစ္ဆာန်တကာတို့တွင် အယပ်နှင့် အကြေးရှိသော တိရစ္ဆာန်ကိုသာစားရ၏။ ၁၀ အယပ်နှင့်အကြေးမရှိသော တိရစ္ဆာန်ကိုမစားရ။ သင်တို့၌ မစင်ကြယ်။ ၁၁ စင်ကြယ်သော ငှက်အမျိုးမျိုးကို စားရသောအခွင့်ရှိ၏။ ၁၂ မစားရသော ငှက်ဟူမူကား၊ လင်းတ၊ ပင်လယ်လင်းတ၊ လင်းယုန်၊ ၁၃ ဒါဟ၊ စွန်၊ ၁၄ လင်းတကြမ်းမျိုး၊ ၁၅ ကျီးမျိုးရှိသမျှ၊ ကုလားအုပ်ငှက်၊ ငှက်ဆိုး၊ ဥဗျိုင်း၊ သိမ်းမျိုး၊ ၁၆ ဇိကွက်၊ ဣဗိတ်၊ ငှက်ကျား၊ ၁၇ ဝံပို၊ ဝံလို၊ ကြိုးကြာ၊ ၁၈ တောငန်း၊ ဒုံးစပ်မျိုး၊ ဒုံးကုလား၊ လင်းနို့မှစ၍၊ ၁၉ အတောင်ရှိလျက် တွားတတ်သော တိရစ္ဆာန် ရှိသမျှတို့သည်၊ သင်တို့၌ မစင်ကြယ်သည် ဖြစ်၍ အသားကို မစားရ။ ၂၀ စင်ကြယ်သော ငှက်အမျိုးမျိုးကို စားရသော အခွင့်ရှိ၏။ ၂၁ အလိုလို သေသော အကောင်ကိုမစားရ။ သင်တို့၌ တည်းခိုသော တပါးအမျိုးသား စားစရာဖို့ ပေးရမည်။ သို့မဟုတ် တစ်ကျွန်း တနိုင်ငံသားတို့အား ရောင်းရမည်။ သင်တို့သည် သင်တို့၏ ဘုရားသခင် ထာဝရဘုရားအဖို့ သန့်ရှင်းသော လူမျိုးဖြစ်ကြ၏။ ဆိတ်သူငယ်ကို အမိနို့ရည်နှင့် မပြုတ်မချက်ရ။

ဆယ်ဘို့တစ်ဘို့ ပတ်သက်၍

CROSS REFERENCES

ယောဘ ၂၈း၂၈
၂၈ လူတို့အားလည်း ထာဝရဘုရားကို ကြောက်ရွှံ့ခြင်းသည် ပညာဖြစ်ကြောင်းနှင့်၊ ဒုစရိုက်ကို ရှောင်ခြင်းသည် ဉာဏ်ဖြစ်ကြောင်းကို မိန့်တော်မူပြီဟု မြွက်ဆို၏၊၊

ဆာ ၁၉း၉
၉ ထာဝရဘုရားကို ကြောက်ရွံ့ခြင်း သဘောသည် သန့်ရှင်းသည်ဖြစ်၍၊ ကာလအစဉ် အမြဲတည်၏။ ထာဝရဘုရား၏ စီရင်တော်မူချက်တို့သည် သစ္စာတရားနှင့် ညီ၍၊ တညီတညွတ်တည်း ဖြောင့်မတ်ကြ၏၊၊

ဆာ ၃၃း၈-၉
၈ ထာဝဘုရားကို မြေကြီးတပြင်လုံး ကြောက်ရွံ့စေ၊၊ လောကီနိုင်ငံသား အပေါင်းတို့သည် ရိုသေလေးမြတ်ကြစေ၊၊

ဆာ ၃၄း၁၁
၁၁ အချင်းသူငယ်တို့ လာကြလော့။ ငါ့စကားကို နားထောင်ကြလော့။ ထာဝရဘုရားကို ကြောက်ရွံ့ခြင်း တရားကို သင်တို့အား ငါသွန်သင်မည်။

ဆာ ၁၁၁း၁၀
၁၀ ထာဝရဘုရားကို ကြောက်ရွံ့သော သဘောသည် ပညာ၏ အချုပ်အခြာဖြစ်၏။ ပညတ်တော်တို့ကို စောင့်ရှောက်သမျှသော သူတို့သည် ကောင်းသော ဥာဏ်ရှိကြ၏။ ဂုဏ်အသရေတော်သည် အစဉ်အမြဲ တည်သတည်း။

ဆာ ၁၁၂း၁
၁ ထာဝရဘုရားကို ကြောက်ရွံ့၍၊ ပညတ်တော်တို့၌ အလွန်မွေ့လျော်သောသူသည် မင်္ဂလာရှိ၏။

ဆာ ၁၂၈း၁
၁ ထာဝရဘုရားကို ကြောက်ရွံ့၍၊ လမ်းခရီးတော်သို့ လိုက်သွားသမျှ သောသူတို့သည် မင်္ဂလာ ရှိကြ၏။

ဆာ ၁၂၈း၄
၄ ထာဝရဘုရားကို ကြောက်ရွံ့သောသူသည်၊ ထိုသို့သော မင်္ဂလာ ရှိရလိမ့်မည်။

သု ၂း၅
၅ ထာဝရဘုရားကို ကြောက်သော သဘော၌ ကျင်လည်၍၊ ဘုရားသခင်ကို သိသောဥာဏ်နှင့် ပြည့်စုံလိမ့်မည်။

သု ၈း၁၃
၁၃ ထာဝရဘုရားကို ကြောက်ရွံ့သော သဘောကား၊ ဒုစရိုက်ကို မုန်းသော သဘောတည်း။ မာနထောင်လွှားခြင်း၊ စော်ကားခြင်း၊ မကောင်းသောလမ်းသို့လိုက်ခြင်း၊ ကောက်သောစကားဖြင့် ပြောဆိုခြင်းတို့ကို ငါမုန်း၏။

သု ၉း၁၀
၁၀ ထာဝရဘုရားကို ကြောက်ရွံ့သောသဘောသည် ပညာ၏မူလ မြစ်ဖြစ်၏။ သန့်ရှင်းတော်မူသော ဘုရားကို သိကျွမ်းသော သဘောသည် ဥာဏ်ဖြစ်၏။

သု ၁၄း၂
၂ ဖြောင့်သောလမ်းသို့လိုက်သောသူသည် ထာဝရဘုရားကိုကြောက်ရွံ့တတ်၏။ ကောက်သောလမ်းကိုလိုက်သောသူမူကား၊ မထီမဲ့မြင်ပြုတတ်၏။

သု ၁၅း၁၆
၁၆ နှောက်ယှက်ခြင်းနှင့်ယှဉ်၍ ကြီးစွာသောစည်းစိမ်ထက်ထာဝရဘုရားကိုကြောက်ရွံ့ခြင်းနှင့် ယှဉ်သောဥစ္စာအနည်းငယ်သည်သာ၍ကောင်း၏။

သု ၁၅း၃၄
၃၄ ထာဝရဘုရားကို ကြောက်ရွံ့သောသဘောသည် ပညာကိုသွန်သင်ခြင်းဖြစ်၏၊၊ ဂုဏ်အသရေအရင်၌ နှိမ့်ချခြင်း၏နေရာရှိ၏၊၊

သု ၂၃း၁၇
၁၇ အပြစ်ထင်ရှားသောသူတို့ကို ငြူစူသောစိတ်မရှိစေနှင့်၊ တနေ့လုံး ထာဝရဘုရားကိုကြောက်ရွံ့သောသဘောရှိစေလော့၊၊

ဒေသနာ ၁၂း၁၃
၁၃ အချုပ် အခြာစကားဟူမူကား ဘုရားသခင်ကို ကြောက်ရွံ့၍၊ ပညတ်တော်တို့ကို စောင့်ရှောက်လော့။ ဤရွေ့ကား၊ လူနှင့်ဆိုင်သော အမှုအရာအလုံးစုံတို့ကို ချုပ်ခြာသတည်း။

ကောလော ၃း၂၂
၂၂ အစေခံကျွန်တို့၊ သခင်ဘုရားကို ကြောက်ရွံ့လျက်၊ လူတို့၏စိတ်ကို နူးညွတ်စေသောသူကဲ့သို့၊ မျက်မှောက်၌ သာနား ထောင်သည်မဟုတ်၊ စိတ်နှစ်ခွမရှိဘဲ၊ လောကီသခင်၏ စကားကို အရာရာ၌ နားထောင်ကြလော့။

၂၂ လယ်ယာ၌ တစ်နှစ်တစ်နှစ်တွင် သိမ်းရသော အသီးအနှံ ဆယ်ဘို့တစ်ဘို့ကို အမှန်ခွဲထားရမည်။ ၂၃ သင်တို့၏ ဘုရားသခင် ထာဝရဘုရားသည် နာမတော်ကို တည်စေဖို့ရာ ရွေးကောက်တော်မူသော အရပ်၌စပါး၊ စပျစ်ရည်၊ ဆီမှစ၍၊ သိုး၊ နွားတွင် အဦးဖွားသော သားငယ်၊ ဆယ်ဘို့တစ်ဘို့ကို ရှေ့တော်မှာ စားရကြမည်။ ထိုသို့ပြုလျှင်၊ သင်တို့၏ ဘုရားသခင် ထာဝရဘုရားကို အစဉ် ကြောက် ရွံ့ရမည်အကြောင်း၊ [A] သင်ရကြလိမ့်မည်။ ၂၄ သင်တို့၏ ဘုရားသခင် ထာဝရဘုရား ကောင်းကြီး ပေးတော်မူသောအခါ၊ နာမတော်ကို တည်စေဖို့ရာ ရွေးကောက်တော်မူသော အရပ်သည် ဝေးလွန်း၍ ခရီးရှည်လျားသဖြင့်၊ ဥစ္စာ ဆယ်ဘို့တစ်ဘို့ကို ဆောင်၍ မသွားနိုင်လျှင်၊ ၂၅ ထိုဥစ္စာကို ရောင်းပြီးမှ၊ ငွေကို ကိုင်လျက်၊ သင်တို့၏ ဘုရားသခင် ထာဝရဘုရား ရွေးကောက်တော်မူသော အရပ်သို့ သွား၍၊ ၂၆ စားချင်သော စိတ်အလိုရှိသည်အတိုင်း၊ နွား၊ သိုး၊ စပျစ်ရည်၊ သေရည် အစရှိသော စားချင်သမျှကို ဝယ်၍၊ သင်တို့၏ ဘုရားသခင် ထာဝရဘုရား ရှေ့တော်မှာ၊ အိမ်သူ အိမ်သားများနှင့်တကွ စားသောက်လျက်၊ ရွှင်လန်းခြင်းကို ပြုကြရမည်။ ၂၇ သို့ရာတွင်၊ သင်တို့၌ တည်းခိုသော လေဝိသားဟူမူကား၊ သင်တို့နှင့် ရော၍၊ အဘို့မရှိ၊ အမွေကို မခံရသောကြောင့်၊ သူ့ကို မစွန့်မပစ်ရဘဲ၊ ၂၈ တတိယနှစ်တွင် သိမ်းသော အသီးအနှံ ဆယ်ဘို့တစ်ဘို့ ရှိသမျှကို ထုတ်၍ မြို့ထဲမှာ သိုထားရမည်။ ၂၉ သင်တို့နှင့်ရော၍ အဘို့မရှိ၊ အမွေကို မခံရသော လေဝိသား၊ သင်တို့နေရာအရပ်၌ ရှိသော တပါးအမျိုးသား၊ မိဘမရှိသော သူငယ်၊ မုဆိုးမများတို့သည် လာ၍ ဝစွာစားရကြမည်။ သို့ဖြစ်လျှင် သင်တို့၏ ဘုရားသခင် ထာဝရဘုရားသည်၊ သင်တို့ပြုလေရာ၌ ကောင်းကြီး ပေးတော်မူမည်။