ဟောရှေအနာဂတ္တိ
အခန်းကြီး ၁၃
၁ ဧဖရိမ်သည်နှုတ်မြွက်သောအခါ သူတပါးကြောက်လန့်တတ်၏။ သူသည်ဣသရေလအမျိုး၌ မြင့်မြတ်၏။ နောက်တဖန် ဗာလဘုရားအားဖြင့်ပြစ်မှားသောကြောင့်သေ၏။ ၂ ယခုမှာအထပ်ထပ်ပြစ်မှား၍ကိုယ်ဥာဏ်ပညာအားဖြင့်အရည်သွန်းသော ငွေရုပ်တု၊ ဆရာသမားလုပ်တတ်သောရုပ်တုဆင်းတုများကိုကိုယ်အဘို့လုပ်ကြ၏။ လုပ်ပြီးမှယဇ်ပူဇော်သောသူသည်နွားသငယ်ကို နမ်းစေ၊ ဟုဆိုတတ်ကြ၏။ ၃ ထိုကြောင့်၊ သူတို့သည်နံနက်မိုးတိမ်ကဲ့သို့၎င်း၊ စောစောကွယ်ပျောက်တတ်သောနှင်းကဲ့သို့၎င်း၊ ကောက်နယ်တလင်းမှလေဘွေတိုက်သွားသောဖွဲကဲ့သို့၎င်း၊ မီးဖိုထဲကထွက်သောမီးခိုးကဲ့သို့၎င်း၊ ဖြစ်ရကြလိမ့်မည်။ ၄ သို့ရာတွင်ငါထာဝရဘုရားသည် သင့်ကိုအဲဂုတ္တုပြည်မှကယ်နှုတ်သော သင်၏ဘုရားသခင်ဖြစ်၏။ ငါမှတပါးအခြားသောဘုရားသခင်ကိုသင်မသိပြီ။ ငါမှတပါးကယ်တင်နိုင်သောသခင်မရှိ။ ၅ အလွန်သွေ့ခြောက်သောအရပ်တည်းဟူသောတော၌ ပင်သင့်ကိုငါသိပြီ။ ကျက်စားရာအရပ်၌ ဝပြောစွာစားရကြ၏။ ၆ ဝသောအခါဝါကြွားသောစိတ်ရှိ၍၊ ငါ့ကိုမေ့လျော့ကြ၏။ ၇ ထိုကြောင့်၊ သူတို့၌ ငါသည်ခြင်္သေ့ကဲ့သို့ဖြစ်မည်။ လမ်းနားမှာချောင်းသောကျားသစ်ကဲ့သို့သူတို့ကိုချောင်းမြောင်းမည်။ ၈ သား ပျောက်သောဝံမကဲ့သို့သူတို့ကိုငါဆီးကြို၍၊ သူတို့နှလုံး၌ ဖုံးသောအမြှေးကိုဆုတ်ဖဲ့မည်။ ခြင်္သေ့မကဲ့သို့တွေ့သောအရပ်၌ ပင်ငါကိုက်စားမည်။ တောသားရဲဖြစ်၍အပိုင်းပိုင်းဆွဲဖြတ်မည်။
၉ အိုဣသရေလ၊ သင့်ကိုကယ်တင်နိုင်သောအရှင်ငါ့ကိုသင်သည်ဆန့်ကျင်ဘက်ပြုသောကြောင့်အကျိုးနည်းရှိ၏။ ၁၀ သင်၏ရှင်ဘုရင်သည်အဘယ်မှာရှိသနည်း။ သင်နေရာမြို့ရှိသမျှတို့၌ ကယ်တင်ပါစေသော်။ သင်၏တရားသူကြီးတို့သည်အဘယ်မှာ ရှိကြသနည်း။ ၁၁ ရှင်ဘုရင်နှင့်မင်းများကိုပေးပါဟုသင်တောင်းသောကြောင့်၊ ငါ့အမျက်ထွက်၍ရှင်ဘုရင်ကိုပေးပြီ။ တဖန် ပြင်းစွာအမျက်ထွက်၍ရှင်ဘုရင်ကိုပယ်ရှားမည်။
၁၂ ဧဖရိမ်ပြုသောဒုစရိုက်ကိုငါထုတ်ထား၍သူ၏အပြစ်ကိုသိုမှီးပြီ။ ၁၃ သူသည်သားဖွားသောမိန်းမကဲ့သို့ဝေဒနာကိုခံရချိန်နီးပြီ။ မိုက်သောအမျိုးသားဖြစ်၏။ သားဖွားရာဝမ်းဝ၌ ကြာမြင့်စွာနေပါသည်တကား။
၁၄ သူတို့ကိုမရဏာနိုင်ငံမှတပါးငါကယ်လွှတ်မည်။ သေမင်းလက်မှရွေးမည်။ အိုသေမင်း၊ သင့်ကိုကာလနာစွဲစေမည်။ အိုမရဏာနိုင်ငံသင်၌ ဖျက်ဆီးသောဘေးကိုရောက်စေမည်။ [A] နောင်တရမည် အကြောင်းကိုပမာဏမပြု၊
၁၅ မိမိညီအစ်ကိုတို့တွင်အသီးများစွာသီးတတ်သော်လည်း၊ အရှေ့လေလာလိမ့်မည်။ ထာဝရဘုရား၏လေသည်တောမှလာ၍ သူ၏စမ်းရေတွင်းကိုခန်းခြောက်စေသဖြင့်ရေပြတ်လိမ့်မည်။ ဘဏ္ဍာတိုက်၌ ရှိသမျှသောတန်ဆာအကောင်းအမြတ်တို့ကိုရန်သူလုယူလိမ့်မည်။ ၁၆ ရှမာရိမြို့သည်မိမိဘုရားသခင်ကိုပုန်ကန်သောကြောင့်ပျက်စီးလိမ့်မည်။ မြို့သားတို့သည်ဓါးဖြင့်လဲ၍သေကြလိမ့်မည်။ သူငယ်တို့သည်မြေပေါ်မှာဆောင့်ဖွပ်ခြင်းကို၎င်း၊ ကိုယ်ဝန်ဆောင်သောမိန်းမတို့သည်ဝမ်းခွဲခြင်းကို၎င်းခံရကြလိမ့်မည်။
