၁ ယုဒရှင်ဘုရင် ယောသန်မင်း၊ အာခတ်မင်း၊ ဟေဇကိမင်းတို့ လက်ထက်၌ မောရရှရွာသား မိက္ခာသည် ရှမာရိမြို့နှင့် ယေရုရှလင်မြို့ အဘို့ခံရသော ထာဝရဘုရား၏ ဗျာဒိတ်တော်ဟူမူကား၊ ၂ အိုလူများအပေါင်းတို့၊ ကြားကြလော့။ အိုပြည်နှင့်ပြည်သား အပေါင်းတို့၊ နားထောင်ကြလော့။ အရှင်ထာဝရဘုရား တည်းဟူသော သန့်ရှင်းသော ဗိမာန်တော်ထဲက ဘုရားရှင်သည်၊ သင်တို့တဘက်၌ သက်သေခံတော်မူမည်။ ၃ ထာဝရဘုရားသည် ကျိန်းဝပ်တော်မူရာ အရပ်ဌာနတော်ထဲက ထွက်ကြွဆင်းသက်၍၊ မြင့်သော မြေအရပ်တို့ကို နင်းတော်မူမည်။ ၄ မီးရှေ့မှာ ဖယောင်းကဲ့သို့၎င်း၊ ချောက်ကြီးမှ ဆင်းသောရေကဲ့သို့၎င်း၊ ရှေ့တော်၌ တောင်တို့သည် အရည်ဖြစ်၍၊ ချိုင့်တို့သည်လည်း အက်ကွဲကြလိမ့်မည်။ [A] ၅ ထိုအမှုသည် ယာကုပ်လွန်ကျူး၍၊ ဣသရေလအမျိုး ပြစ်မှားသောကြောင့် ရောက်သတည်း။ ယာကုပ်လွန်ကျူးရာ ကားအဘယ်သို့နည်း။ ရှမာရိမြို့မဟုတ်လော။ ယုဒ၏ မြင့်ရာအရပ်ကား အဘယ်မှာရှိသနည်း။ ယေရုရှလင်မြို့၌ ရှိသည်မဟုတ်လော။ ၆ ထိုကြောင့် ရှမာရိမြို့ကို လယ်ပြင်၌ မြေပုံကဲ့သို့၎င်း၊ စပျစ်ဥယျာဉ် စိုက်ရာအရပ်ကဲ့သို့၎င်း ငါဖြစ်စေမည်။ မြို့ရိုးကျောက်တို့ကို ချိုင့်ထဲသို့သွန်ပစ်၍ မြို့ရိုးအမြစ်ကို လှန်ပြမည်။ ၇ ခပ်သိမ်းသော ရုပ်တုဆင်းတုကို ကိုချိုးဖဲ့မည်။ သူငှါးလုပ်၍ ရသမျှသောအခတို့ကို မီးရှို့မည်။ မှားသော ဘုရားရှိသမျှတို့ကို သုတ်သင်ပယ်ရှင်းမည်။ ပြည်တန်ဆာလုပ်၍ ဥစ္စာကို ဆည်းဖူးသည်ဖြစ်၍၊ ထိုဥစ္စာသည် ပြည်တန်ဆာလက်သို့ တဖန်ရောက်ရဦးမည်။ ၈ ထိုအမှုကြောင့် ငါသည် ငိုကြွေးမြည်တမ်းမည်။ အဝတ်ကိုချွတ်၍ အချည်းစည်းလည်သွားမည်။ [B] မြေခွေးကဲ့သို့အူလျက်၊ ကုလားအုပ်ငှက်ကဲ့သို့ မြည်လျက်နေမည်။ ၉ သူခံရသော ဒဏ်နာမပျောက်နိုင်။ ယုဒပြည်တိုင်အောင် ကူးသဖြင့်၊ ငါ၏အမျိုးသားနေရာ ယေရုရှလင်မြို့တံခါးသို့ ရောက်လေပြီ။၁၀ ဂါသမြို့၌ သိတင်းမပြောကြနှင့်။ အလျှင်းမငိုကြွေးကြနှင့်။ ဗေသောဖရာမြို့မှာ မြေမှုန့်၌ လူးလဲလျက်နေကြလော့။ ၁၁ အိုရှဖိရအမျိုးသမီး၊ အဝတ်ကိုချွတ်၍ အရှက်ကွဲလျက် သွားလော့။ ဇာနန်မြို့သမီးသည် ငိုကြွေးခြင်းကို ပြုလျက်မထွက်ရ။ ဗေသဇေလမြို့သည် သင်တို့ တည်းခိုရသောအခွင့်ကို မပေးရ။ ၁၂ မာရုတ်မြို့ သမီးသည်လည်း ကောင်းသောအရာကို တောင့်တ၍ နာကျင်လျက်ရှိ၏။ အကြောင်းမူကား၊ ထာဝရဘုရား ထံတော်မှ ဘေးဒဏ်သည် ယေရုရှလင်မြို့တံခါးသို့ ရောက်လေပြီ။ ၁၃ အိုလာခိရှမြို့သမီး၊ လျှင်မြန်သော မြင်းကိုရထား၌ ကလော့။ သင်သည် ဣသရေလ၏ လွန် ကျူးခြင်းကို လက်ခံ၍၊ ဇိအုန်သတို့သမီးအား အပြစ်လမ်းကို ပြသတည်း။ ၁၄ ထိုကြောင့် သင်သည် ဂါသပြည် မောရရှက်မြို့သို့ လက်ဆောင်ကို ပေးလိုက်ရမည်။ အာခဇိပ်မြို့သားတို့သည် ဣသရေလ ရှင်ဘုရင်တို့ကို လှည့်စားကြလိမ့်မည်။ ၁၅ အိုမရေရှမြို့သမီး၊ သင်၏ ဥစ္စာကို အမွေခံသောသူကို ငါခေါ်ခဲ့မည်။ သူသည် ဣသရေလဘုန်း၊ အဒုလံမြို့သို့ ရောက်လိမ့်မည်။ ၁၆ ချစ်ဘွယ်သော သင်၏သားသမီးတို့သည် သိမ်းသွားခြင်းကို ခံရသောကြောင့်၊ သူတို့အတွက် သင်သည် ခေါင်းပြောင်အောင် ဆံပင်ကိုရိတ်၍ နေလော့။ လင်းယုန်ကဲ့သို့ ကျယ်စွာသော ခေါင်းပြောင်ခြင်းကိုပြုလော့။