သုတ္တံကျမ်း

အခန်းကြီး ၂၈

CROSS REFERENCES

ဆာ ၃၂း၅
၅ တဖန်အကျွန်ုပ်သည် ကိုယ်အပြစ်ကို ရှေ့တော်၌ ဝန်ချပါ၏။ ပြုမိသော ဒုစရိုက်ကိုဝှက်၍ မထားပါ။ ငါလွန်ကျူးသော အရာကို ထာဝရဘုရားအား ဖေါ်ပြ တောင်းပန်မည်၊ ဟုပြောဆိုသောအခါ၊ ကိုယ်တော်သည် အကျွန်ုပ် ပြစ်မှားခြင်းအပြစ်ကို လွှတ်တော်မူ၏။

၁ ယော ၁း၉
၉ ကိုယ်အပြစ်တို့ကို ဖော်ပြတောင်းပန်လျှင်၊ ငါတို့အပြစ်များကိုလွှတ်၍ ဒုစရိုက်ရှိသမျှနှင့် ကင်းစင်စေခြင်းငှာ ဘုရားသခင်သည် သစ္စာတရားနှင့်၎င်း၊ ဖြောင့်မတ်ခြင်းတရားနှင့်၎င်း၊ ပြည့်စုံတော်မူ၏။

၁ လိုက်သောသူမရှိသော်လည်း၊ မတရားသောသူသည်ပြေးတတ်၏။ ဖြောင့်မတ်သောသူမူကား၊ ခြင်္သေ့ကဲ့သို့ရဲရင့်တတ်၏။ ၂ ပြည်သူပြည်သားအပြစ်ကြောင့်၊ မင်းတို့သည်များပြားတတ်ကြ၏။ ဥာဏ်ပညာနှင့်ပြည့်စုံသောသူအားဖြင့်နိုင်ငံတည်တတ်၏။ ၃ ဆင်းရဲသားတို့ကိုညှဉ်းဆဲသောဆင်းရဲသားသည်အဘယ်စားစရာမျှမကြွင်းစေဘဲ၊ သုတ်သင်ပယ်ရှင်းသောမိုးရေနှင့်တူ၏။ ၄ တရားကိုဖျက်သောသူသည်မတရားသောသူတို့ကိုချီးမွမ်းတတ်၏။ တရားကိုစောင့်သောသူမူကား၊ သူတို့နှင့်ဆန့်ကျင်ဘက်ပြုတတ်၏။ ၅ အဓမ္မလူသည်တရားစီရင်ခြင်းကိုနားမလည်တတ်။ ထာဝရဘုရားကိုရှာသောသူမူကားခပ်သိမ်းသောစီရင်ခြင်းကို နားလည်တတ်၏။ ၆ မမှန်သောအမှုကိုပြုသောသူသည်ငွေရတတ်သော်လည်း၊ ဖြောင့်မတ်ခြင်းလမ်းသို့လိုက်သောဆင်းရဲသားသည်သာ၍မြတ်၏။ ၇ တရားကိုစောင့်သောသူသည်ပညာရှိသောသားဖြစ်၏။ စားကြူးသောသူတို့နှင့်ပေါင်းဖေါ်သောသူမူကား၊ မိမိအဘကိုအရှက်ခွဲတတ်၏။ ၈ အတိုးစား၍မတရားသောအမြတ်အားဖြင့်ဥစ္စာကိုဆည်းပူးသောသူသည်ဆင်းရဲသားတို့ကိုသနားသောသူအဘို့သာဆည်းပူးတတ်၏။ ၉ တရားမနာ၊ လွှဲသွားသောသူသည်ဆုတောင်းသော်လည်းသူ၏ပဌနာစကားသည် စက်ဆုပ်ရွံ့ရှာဖွယ်ဖြစ်၏။ ၁၀ ဖြောင့်မတ်သောသူကိုလမ်းလွှဲ၍မကောင်းသောလမ်းထဲသို့သွေးဆောင်သောသူသည်မိမိတူးသောတွင်းထဲသို့မိမိကျလိမ့်မည်။ သဘောဖြောင့်သောသူမူကား၊ ကောင်းသောအရာတို့ကိုအမွေခံရလိမ့်မည်။ ၁၁ ငွေရတတ်သောသူက၊ ငါသည်ပညာရှိ၏ဟုကိုယ်ကိုထင်တတ်၏။ ဥာဏ်ကောင်းသောဆင်းရဲသားမူကား၊ ထိုသူကိုစစ်ကြောတတ်၏။ ၁၂ ဖြောင့်မတ်သောသူတို့သည်ဝမ်းမြောက်သောအခါဘုန်းကြီးတတ်၏။ မတရားသောသူတို့သည်ချီးမြှောက်ခြင်းသို့ရောက်သောအခါလူတို့သည် ပုန်းရှောင်၍နေတတ်ကြ၏။ ၁၃ မိမိအပြစ်ကိုဝှက်ထားသောသူသည်ချမ်းသာမရ။ မိမိအပြစ်ကိုဖေါ်ပြဝန်ချ၍စွန့်ပစ်သောသူမူကား၊ ကရုဏာတော်ကိုခံရလိမ့်မည်။ [A] ၁၄ အစဉ်မပြတ်ကြောက်ရွံ့သောသူသည်မင်္ဂလာရှိ၏။ မိမိစိတ်နှလုံးကိုခိုင်မာစေသောသူမူကား၊ ဘေးဥပဒ်နှင့်တွေ့လိမ့်မည်။ ၁၅ ဆင်းရဲသားတို့ကိုအုပ်စိုးသောအဓမ္မမင်းသည်ဟောက်သောခြင်္သေ့၊ လှည့်လည်သောဝံနှင့်တူ၏။ ၁၆ ဥာဏ်မရှိသောမင်းသည်ပြင်းစွာညှဉ်းဆဲတတ်၏။ လောဘကိုမုန်းသောမင်းမူကား၊ အသက်တာရှည်လိမ့်မည်။ ၁၇ လူ့အသက်ကိုညှဉ်းဆဲသောသူသည်သင်္ချိုင်းတွင်းသို့ပြေးပါလေစေ။ အဘယ်သူမျှမဆီးတားစေနှင့်။

၁၈ ဖြောင့်သောလမ်းသို့လိုက်သောသူသည်ဘေးလွတ်လိမ့်မည်။ ကောက်သောလမ်းသို့လိုက်သောသူမူကား၊ ချက်ချင်းလဲလိမ့်မည်။ ၁၉ လယ်လုပ်သောသူသည်ဝစွာစားရ၏။ အချည်းနှီးသောအမှုကိုစောင့်သောသူမူကားဆင်းရဲခြင်းနှင့်ဝလိမ့်မည်။ ၂၀ သစ္စာစောင့်သောသူသည်ကောင်းကြီးမင်္ဂလာနှင့်ကြွယ်ဝလိမ့်မည်။ ငွေရတတ်ခြင်းငှါအလျှင်အမြန်ပြုသောသူမူကား၊ အပြစ်နှင့်မလွတ်ရ။ ၂၁ လူမျက်နှာကိုမထောက်ကောင်း။ သို့သော်လည်း၊ လူသည်မုန့်တဖဲ့ကိုရခြင်းငှါဒုစရိုက်ကိုပြုလိမ့်မည်။ ၂၂ ငွေရတတ်ခြင်းငှါအလျှင်အမြန်ပြုသောသူသည်မနာလိုသောသဘောရှိတတ်၏။ နောက်တဖန်ဆင်းရဲခြင်းသို့ရောက်မည်၊ ဟုမအောက့်မေ့တတ်။ ၂၃ ချော့မော့သောစကားကိုပြောသောသူသည်ကျေးဇူးကိုခံရသည်ထက်၊ ဆုံးမပြစ်တင်သောသူသည် နောက်တဖန်သာ၍ကျေးဇူးကိုခံရလိမ့်မည်။ ၂၄ အပြစ်မရှိဟုဆိုလျက်၊ မိဘဥစ္စာကိုလုယူသောသူသည် ဖျက်ဆီးသောသူ၏ အပေါင်းအဖေါ်ဖြစ်၏။ ၂၅ စိတ်မြင့်သောသူသည်ခိုက်ရန်ကိုနှိုးဆော်တတ်၏။ ထာဝရဘုရားကိုခိုလှုံသောသူမူကား၊ ကြွယ်ဝတတ်၏။ ၂၆ မိမိစိတ်နှလုံးကိုကိုးစားသောသူသည်လူမိုက်ဖြစ်၏။ ပညာသတိနှင့်ကျင့်သောသူမူကား၊ ဘေးလွတ်တတ်၏။ ၂၇ ဆင်းရဲသားတို့အားစွန့်ကြဲသောသူသည်ကိုယ်တိုင်မဆင်းရဲရာ။ လွှဲရှောင်သောသူမူကား၊ များစွာသောကျိန်ဆဲခြင်းကိုခံရလိမ့်မည်။ ၂၈ မတရားသောသူတို့သည်ချီးမြှောက်ခြင်းသို့ရောက်သောအခါ၊ လူတို့သည်ပုန်းရှောင်၍နေရကြ၏။ ပျက်စီးခြင်းသို့ ရောက်သောအခါ၊ ဖြောင့်မတ်သောသူတို့သည်ပွားများတတ်ကြ၏။