-
AA
+
🡀
|
🡂
သုတ္တံကျမ်း
၁၄
ပဋိညာဉ်တရားဟောင်း
ဒေသနာကျမ်း
ရှောလမုန်သီချင်း
ဟေရှာယ အနာဂတ္တိ
ယေရမိ အနာဂတ္တိ
ယေရမိ မြည်တမ်းစကား
ယေဇကျေလ အနာဂတ္တိ
ဒံယေလ အနာဂတ္တိ
ဟောရှေအနာဂတ္တိ
ယောလ အနာဂတ္တိ
အာမုတ် အနာဂတ္တိ
ဩဗဒိဗျာဒိတ်ရူပါရုံ
ယောန၀တ္ထု
မိက္ခာ အနာဂတ္တိ
နာဟုံ အနာဂတ္တိ
ဟဗက္ကုတ် အနာဂတ္တိ
ဇေဖနိ အနာဂတ္တိ
ဟဂ္ဂဲ အနာဂတ္တိ
ဇာခရိ အနာဂတ္တိ
မာလခိအနာဂတ္တိ
ပဋိညာဉ်တရားသစ်
Book in English


သုတ္တံကျမ်း
အခန်းကြီး ၁၄


CROSS REFERENCES






ပညာရှိသောမိန်းမသည်မိမိအိမ်ကိုတည်ဆောက်တတ်၏။ မိုက်သောမိန်းမမူကား၊ ကိုယ်လက်နှင့်ဖြိုဖျက်တတ်၏။ ​ဖြောင့်သောလမ်းသို့လိုက်သောသူသည် ထာဝရဘုရားကိုကြောက်ရွံ့တတ်၏။ [A] ကောက်သောလမ်းကိုလိုက်သောသူမူကား၊ မထီမဲ့မြင်ပြုတတ်၏။ မိုက်သောသူ၏နှုတ်၌ မာနကြိမ်လုံးရှိ၏။ ပညာရှိသောသူ၏နှုတ်ခမ်းတို့သည်ကယ်တင်သောအမှုကိုပြုတတ်၏။ နွားထီးမရှိသောတင်းကုပ်သည်စင်ကြယ်၏။ သို့သော်လည်း၊ နွားထီးခွန်အားဖြင့်များစွာသောစီးပွားကိုရတတ်၏။(a) သစ္စာရှိသောသက်သေသည်မုသာမသုံးတတ်။ သစ္စာပျက်သောသက်သေမူကားမုသာကိုသုံးတတ်၏။ မထီမဲ့မြင်ပြုသောသူသည်ပညာကိုရှာ၍မတွေ့ရာ။ ဥာဏ်ရှိသောသူမူကား၊ ပညာတတ်ကိုရလွယ်၏။ မိုက်သောသူနှင့်တွေ့၍သူ၏နှုတ်၌ ပညာအတတ်မရှိသည်ကိုသိမြင်လျှင်၊ ထိုသူကိုရှောင်သွားလော့။ ပညာသတိရှိသောသူ၏ပညာကား၊ ကိုယ်သွားရသောလမ်းကိုသိခြင်းတည်း။ မိုက်သောသူ၏မိုက်ခြင်းမူကား၊ ပရိယာယ်တည်း။ မိုက်သောသူတို့သည် ဒုစရိုက်အပြစ်ကိုမထီလေးစားပြုကြ၏။ ​ဖြောင့်မတ်သောသူတို့မူကား၊ တယောက်ကိုတယောက်ကျေးဇူးပြုကြ၏။ ၁၀ စိတ်နှလုံးသည်မိမိဒုက္ခကိုသိ၏။ စိတ်နှလုံးရွှင်လန်းခြင်းအကြောင်းကိုလည်းသူတပါးမဆိုင်တတ်။ ၁၁ မတရားသောသူ၏အိမ်သည်ပြိုလဲတတ်၏။ ​ဖြောင့်မတ်သောသူ၏တဲမူကားပွင့်လန်းတတ်၏။ ၁၂ လူထင်သည်အတိုင်းမှန်သောလက္ခဏာရှိသော်လည်း၊ အဆုံး၌ သေခြင်းသို့ပို့သောလမ်းတမျိုးရှိ၏။ ၁၃ လူသည်ရယ်စဉ်အခါပင်၊ ဝမ်းနည်းသောစိတ်သဘောရှိ၏။ ထိုရယ်မောရွှင်လန်းခြင်းအဆုံး၌ လည်းငြိုးငယ်ခြင်းရှိတတ်၏။ ၁၄ စိတ်နှလုံးဖောက်ပြန်သောသူဖြစ်စေ၊ သူတော်ကောင်းဖြစ်စေ၊ မိမိအကျင့်တို့နှင့်ဝလိမ့်မည်။ ၁၅ ဥာဏ်တိမ်သောသူသည်သူတပါးပြောသမျှကိုယုံတတ်၏။ ပညာသတိရှိသောသူမူကား၊ မိမိသွားရာလမ်းကိုစေ့စေ့ကြည့်ရှုတတ်၏။ ၁၆ ပညာရှိသောသူသည်ကြောက်၍ဒုစရိုက်ကိုရှောင်တတ်၏။ မိုက်သောသူမူကား၊ မာနကြီး၍ရဲရင့်တတ်၏။
CROSS REFERENCES






၁၇ စိတ်တိုသောသူသည်မိုက်စွာသောအမှုကိုပြုတတ်၏။ မကောင်းသောအကြံကိုကြံသောသူကိုလည်းသူတပါးမုန်းလိမ့်မည်။ ၁၈ ဥာဏ်တိမ်သူသည်မိုက်ခြင်းကိုအမွေခံတတ်၏။ ပညာသတိရှိသောသူမူကား၊ သိပ္ပံသရဖူကိုဆောင်းတတ်၏။ ၁၉ လူဆိုးတို့သည်သူတော်ကောင်းရှေ့၌ ၎င်း၊ မတရားသောသူတို့သည်​ဖြောင့်မတ်သောသူ၏အိမ်တံခါးဝ၌ ၎င်းဦးချတတ်ကြ၏။ ၂၀ ဆင်းရဲသောသူသည် မိမိအိမ်နီးချင်းမုန်းခြင်းကိုပင်ခံရမည်။ ငွေရတတ်သောသူ၌ မူကား၊ များစွာသောအဆွေခင်ပွန်းရှိလိမ့်မည်။ ၂၁ မိမိအိမ်နီးနားချင်းကိုမထီမဲ့မြင်ပြုသောသူသည်အပြစ်ရှိ၏။ ဆင်းရဲသောသူကိုသနားသောသူမူကား၊ မင်္ဂလာရှိ၏။ ၂၂ မကောင်းသောအကြံကိုကြံတတ်သောသူတို့သည်မှားယွင်းကြလိမ့်မည်။ ကျေးဇူးပြုမည်ဟုကြံတတ်သောသူတို့မူကား၊ ကရုဏာအကျိုးနှင့်သစ္စာအကျိုးကိုခံရကြလိမ့်မည်။ ၂၃ ကြိုးစား၍လုပ်လေရာရာ၌ ကျေးဇူးရှိ၏။ စကားများခြင်းအကျိုးမူကား၊ ဆင်းရဲခြင်းသက်သက်တည်း။ ၂၄ ပညာရှိသောသူတို့၏စည်းစိမ်ဥစ္စာသည်သူတို့ဦးရစ်သရဖူဖြစ်၏။ မိုက်သောသူတို့၏မိုက်ခြင်းမူကား၊ အမိုက်သက်သက်ဖြစ်၏။ ၂၅ မှန်သောသက်သေသည်သူ့အသက်ကိုကယ်တင်တတ်၏။ မမှန်သောသက်သေမူကား၊ မုသာကိုသုံးတတ်၏။ ၂၆ ထာဝရဘုရားကိုကြောက်ရွံ့ခြင်းသည်အားကြီးသောကိုးစားရာအခွင့်ကိုဖြစ်စေတတ်၏။ သားတော်တို့သည်လည်း၊ ခိုလှုံရာအရပ်ကိုရကြလိမ့်မည်။ ၂၇ ထာဝရဘုရားကို ကြောက်ရွံ့သောသဘောသည်အသေခံရာကျော့ကွင်းတို့မှလွှဲရှောင်ရာအသက်စမ်းရေတွင်းဖြစ်၏။ ၂၈ ပြည်သားများပြားရာ၌ ရှင်ဘုရင်၏ဘုန်းတော်တည်၏။ ပြည်သားနည်းပါးရာ၌ ကား၊ မင်းအကျိုးနည်းခြင်းရှိ၏။ ၂၉ စိတ်ရှည်သောသူသည် ပညာကြီး၏။ စိတ်တိုသောသူမူကား၊ အထူးသဖြင့်မိုက်ပေ၏။ ၃၀ ကျန်းမာသောနှလုံးသည်ကိုယ်အသက်ရှင်စေသော အကြောင်း။ ငြူစူသောသဘောမူကား၊ အရိုးဆွေးမြေ့ခြင်းအကြောင်းဖြစ်၏။ ၃၁ ဆင်းရဲသားတို့ကိုညှဉ်းဆဲသောသူသည် ဖန်ဆင်းတော်မူသောဘုရားကိုကဲ့ရဲ့၏။ ဘုရားကိုရိုသေသောသူမူကား၊ [B] ဆင်းရဲသောသူတို့ကိုသနားတတ်၏။ ၃၂ မတရားသောသူသည်မတရားသဖြင့်ပြုစဉ်အခါ၊ လှဲခြင်းကိုခံရ၏။ ​ဖြောင့်မတ်သောသူမူကား၊ သေသောအခါ၌ ပင်မြော်လင့်စရာရှိ၏။ ၃၃ ဥာဏ်ရှိသောသူ၏နှလုံး၌ ပညာကျိန်းဝပ်တတ်၏။ မိုက်သောသူတို့၏အထဲ၌ ရှိသောအရာမူကား၊ ထင်ရှားတတ်၏။ ၃၄ ​ဖြောင်မတ်ခြင်းတရားသည်ပြည်သားတို့ကိုချီးမြှောက်တတ်၏။ ဒုစရိုက်အပြစ်မူကား၊ ပြည်သားများတို့ကိုရှုတ်ချတတ်၏။ ၃၅ ပညာရှိသောကျွန်အားရှင်ဘုရင်သည်ကျေးဇူးပြုတတ်၏။ အရှက်ခွဲတက်သော​ကျွန်မူကား၊ အမျက်တော်ကိုခံရမည်။

_________________________
Footnotes


(a) နွားခွန်အားကိုသုံး၍များသောစီးပွားကိုရတတ်၏။But much revenue comes by the strength of the ox.


S E T T I N G S

Font Size
Small
Regular
Big
Large

View Mode
Paragraph
Verse

Screen Width
Half
Full

Save settings?
YES
CANCEL


By clicking YES, you're acknowledging that this website uses cookies to store your preferences on your computer.

About this app
2.000324 | GOSPELMYANMARBIBLE | This online app is made available by Gospel Baptist Church of Indianapolis, IN, USA. Copyright © 2022-2024 GBCUSA. All rights reserved.