ဆာလံကျမ်း

အခန်းကြီး ၅၁

ဒါဝိဒ်သည် ဗာသရှေ့ဘနှင့် မှားယွင်း၍၊ ပရောဖက် နာသန်၏ ဆုံးမခြင်းကို ခံပြီးမှ စပ်ဆိုသောဆာလံ

CROSS REFERENCES

ရော ၃း၄
၄ မဖျက်နိုင်ရာ။ သို့ဖြစ်၍ မိန့်တော်မူချက်သည် ဖြောင့်ပါ၏။ တရားစီရင်သောအခါ အောင်မြင်တော်မူ၏၊ဟုကျမ်းစာ၌ လာသည်နှင့်အညီ၊ လူခပ်သိမ်းတို့သည် သစ္စာပျက်သော်လည်း၊ ဘုရားသခင်၏ သစ္စာတော်သည် တည်စေသတည်း။

၁

အိုဘုရားသခင် ကျေးဇူးပြုချင်သော စေတနာ စိတ်တော်ရှိသည်အတိုင်း အကျွန်ုပ်ကို သနားတော်မူပါ၊၊ စုံမက်တော်မူခြင်း ကရုဏာ များပြားသည်နှင့်အညီ အကျွန်ုပ် လွန်ကျူးခြင်း အပြစ်ကို ဖြေတော်မူပါ၊၊

၂

ဒုစရိုက်အညစ်အကြေးကို အကုန်အစင် ဆေးကြော၍ အကျွန်ုပ်ကို သန့်ရှင်း စေတော်မူပါ၊၊

၃

အကျွန်ုပ် လွန်ကျူးပါပြီ၊ ဟုဝန်ချလျက် ကိုယ်အပြစ်ကို အစဉ်မပြတ်အောက် မေ့လျက်နေပါ၏၊၊

၄

ကိုယ်တော်ကို ပြစ်မှားပါပြီ၊၊ ကိုယ်တော်ကိုသာ ပြစ်မှား၍ မျက်မှောက်တော်၌ပင် မတရားသော အမှုကိုပြုပါပြီ၊၊ သို့ဖြစ်၍ မိန့်တော်မူချက်သည် ဖြောင့်ပါ၏၊၊ တရား စီရင်တော်မူချက်သည် အပြစ်လွတ်ပါ၏၊၊ [A]

၅

အကျွန်ုပ်သည် မွေးစကပင် အပြစ်ပါလျက် ရှိပါ၏၊၊ အမိဝမ်းထဲမှာ ပဋိသန္ဓေ ယူစဉ်ပင် အပြစ်စွဲပါ၏၊၊

၆

ဟုတ်မှန်ဖြောင့်မတ်သော စိတ်နှလုံးကို နှစ်သက်တော်မူသည်ဖြစ်၍ အကျွန်ုပ်၏ စိတ်နှလုံးထဲမှာ ပညာကို သွန်သင်တော်မူပါ၊၊

၇

အကျွန်ုပ်ကို စင်ကြယ်စေခြင်းငှါ ဟုဿုပ်ပင်ညွန့်နှင့် သန့်ရှင်းခြင်း မင်္ဂလာကို ပေးတော်မူပါ၊၊ အကျွန်ုပ်ကို မိုးပွင့်ထက်သာ၍ ဖြူစေခြင်းငှါ ဆေးကြောတော်မူပါ၊၊

၈

စိတ်သက်သာ ဝမ်းမြောက်ခြင်း ရှိမည်အကြောင်း စကားကို အကျွန်ုပ်အား ကြားစေတော်မူသည်၊၊

၉

သို့ပြုလျှင် ချိုးဖဲ့တော်မူသော အရိုးတို့သည် ရွှင်မြူးခြင်း ရှိကြပါလိမ့်မည်၊၊ အကျွန်ုပ် လွန်ကျူးခြင်း ဒုစရိုက်တို့မှ မျက်နှာတော်ကိုလွှဲ၍ အကျွန်ုပ် အပြစ်ရှိသမျှတို့ကိုလည်း ဖြေတော်မူပါ၊၊

၁၀

အိုဘုရားသခင် အကျွန်ုပ်အထဲ၌ စင်ကြယ်သော နှလုံးကို ဖန်ဆင်းတော်မူပါ၊၊ မြဲမြံတည်ကြည်သော သဘောကို အသစ် ပြုပြင်တော်မူပါ၊၊

၁၁

အကျွန်ုပ်ကို အထံတော်ထဲက နှင်ထုတ်တော် မမူပါနှင့်၊၊ သန့်ရှင်းသော ဝိညာဉ်တော်ကို ရုပ်သိမ်းတော်မမူပါနှင့်၊၊(a)

၁၂

ကယ်တင်တော်မူခြင်းနှင့် ယှဉ်သော ဝမ်းမြောက်ခြင်း အခွင့်ကို ပြန်၍ ပေးသနားတော်မူပါ၊၊ ကြည်ညိုသော စေတနာစိတ် သဘောသည် အကျွန်ုပ်ကို ထောက်မပါစေသော်၊၊

၁၃

အကျွန်ုပ်သည်လည်း မတရားသောသူတို့အား တရားတော်လမ်းကို ပြသသွန်သင်ပါမည်၊၊ အပြစ်ရှိသောသူတို့သည် ကိုယ်တော်ထံသို့ ပြန်ကြပါလိမ့်မည်။

CROSS REFERENCES

၁ ဓမ္မ ၁၅း၂၂
၂၂ ရှမွေလကလည်း၊ ထာဝရဘုရား၏ အမိန့်တော်ကို နားထောင်ခြင်း၌ အားရတော်မူ သကဲ့သို့၊ မီးရှို့ရာယဇ် အစရှိသော ယဇ်မျိုးတို့ကို ပူဇော်ခြင်း၌ အားရတော်မူမည်လော။ အလိုတော်သို့ လိုက်ခြင်းသည် ယဇ်မျိုးထက်သာ၍ ကောင်း၏။ နားထောင်ခြင်းသည် သိုးထီးဆီဥထက် သာ၍ကောင်း၏။

ဆာလံ ၄၀း၆-၈
၆ ကိုယ်တော်သည် ယဇ်နှင့် ပူဇော်သက္ကာကို အလိုတော်မရှိသည် ဖြစ်၍ အကျွန်ုပ်နားကို ဖွင့်တော်မူပြီ၊ မီးရှို့ရာယဇ်နှင့် အပြစ်ဖြေရာယဇ်များကို တောင်းတော် မမူသောအခါ၊

ဆာ ၅၀း၈
၈ မီးရှို့သော ယဇ်မှစ၍ ယဇ်ပူဇော်ခြင်း အမျိုးမျိုးအတွက် ငါသည်သင်၌ အပြစ်မတင်၊၊ ထိုယဇ်တို့သည် ငါ့ရှေ့မှာ အစဉ်ရှိကြ၏၊၊

ဆာ ၅၁း၁၆-၁၇
၁၆ ယဇ်ပူဇော်ခြင်းကို အလိုတော်မရှိ၊၊ သို့မဟုတ်လျှင် ယဇ်ပူဇော်ပါမည်၊၊ မီးရှို့သော ယဇ်ပူဇော်ခြင်းကိုပင် နှစ်သက်တော်မမူ၊၊

ဟေရှာယ ၁း၁၁-၁၇
၁၁ ထာဝရဘုရား မိန့်တော်မူသည်ကား၊ သင်တို့ပူဇော်သော ယဇ်အများကို၊ ငါသည် အဘယ်သို့ဆိုင်သနည်း၊၊ မီးရှို့၍ ပူဇော်သော သိုးကောင်၊ ဆူဖြိုးအောင် ကျွေးသော တိရစ္ဆာန်တို့၏ ဆီဥနှင့်ငါဝပြီ၊၊ နွားနှင့်သိုးသငယ်၊ ဆိတ်တို့၏အသွေးကို ငါမနှစ်သက်၊၊

ယေရမိအ ၆း၂၀
၂၀ ရှေဘပြည်မှ လောဗန်ကို၎င်း၊ ဝေးသောပြည်မှ မွှေးသောကြံကို၎င်း၊ အဘယ်ကြောင့် ငါ့ထံသို့ ဆောင်ခဲ့သနည်း။ သင်တို့ မီးရှို့ရာယဇ်တို့ကို ငါအလိုမရှိ။ ပူဇော်သော ယဇ်အမျိုးမျိုးကို ငါမနှစ်သက်။ sမြောက်မျက်နှာမှ လူမျိုးခေါ်လာမည်

ယေရမိအ ရး၂၂-၂၃
၂၂ အကြောင်းမူကား၊ သင်တို့ ဘိုးဘေးများကို အဲဂုတ္တုပြည်မှ ငါနှုတ်ဆောင်သောအခါ၊ မီးရှို့ရာယဇ် အစရှိသော ယဇ်များအတွက် သူတို့ကို ငါမှာထားသည်မဟုတ်။

အာမုတ် ၅း၂၁-၂၂
၂၁ သင်တို့ စောင့်သောပွဲနေ့တို့ကို ငါမုန်း၏။ စက်ဆုပ်ရွံရှာ၏။ ချိုးခြံစွာကျင့်သော နေ့ရက်တို့၌ ငါမမွေ့လျော်၊

မိက္ခာ ၆း၆-ရ
၆ ငါသည် ထာဝရဘုရား ရှေ့တော်သို့ အဘယ် ပူဇော်သက္ကာ ပါလျက်ချဉ်းကပ်၍၊ အမြင့်ဆုံးသော ဘုရားသခင် ရှေ့တော်၌ ကိုးကွယ်ရမည်နည်း။ မီးရှို့ရာယဇ်နှင့် အခါလည်သော နွားသငယ်တို့ကို ဆောင်လျက် ချဉ်းကပ်ရမည်လော။

မာလခိ ၁း၁၀
၁၀ သင်တို့တွင် အဘယ်သူသည် ငါတံခါးတို့ကို ပိတ်လိမ့်မည်နည်း။ သင်တို့သည် ငါ့ယဇ်ပလ္လင်ပေါ်မှာ မီးကိုအချည်းနှီးမညှိရကြ။ သင်တို့ကို ငါအလိုမရှိ။ သင်တို့ပြုသော ပူဇော်သက္ကာကို ငါလက်မခံ၊ ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။

ဟေဗြဲ ၁၀း၅-၉
၅ ထိုကြောင့်၊ ခရစ်တော်သည် ဤလောကသို့ ကြွလာသောအခါ၊ အိုဘုရားသခင်၊ ကိုယ်တော်သည် ယဇ်နှင့် ပူဇော်သက္ကာကို အလိုတော်မရှိသည်ဖြစ်၍၊ အကျွန်ုပ်အဘို့ ကိုယ်ခန္ဓာကို ပြင်ဆင်တော်မူပြီ။

၁၄

အိုဘုရားသခင် အကျွန်ုပ်ကို ကယ်တင်တော်မူသော ဘုရားလူ အသတ်ကို သတ်ခြင်းအပြစ်နှင့် အကျွန်ုပ်ကို ကင်းလွတ်စေတော်မူပါ၊၊ တရားသဖြင့် စီရင်တော်မူခြင်းကို အကျွန်ုပ်လျှာသည် ရွှင်လန်းစွာ သီချင်းဆိုပါမည်၊၊

၁၅

အိုထာဝရဘုရား အကျွန်ုပ်၏ နှုတ်ကို ဖွင့်တော်မူပါ၊၊ ဂုဏ်ကျေးဇူးတော်ကို ချီးမွမ်းမြွက်ဆိုပါမည်၊၊

၁၆

ယဇ်ပူဇော်ခြင်းကို အလိုတော်မရှိ၊၊ [B] သို့မဟုတ်လျှင် ယဇ်ပူဇော်ပါမည်၊၊ မီးရှို့သော ယဇ်ပူဇော်ခြင်းကိုပင် နှစ်သက်တော်မမူ၊၊

၁၇

ဘုရားသခင် နှစ်သက်တော်မူသော ယဇ်မူကား ကျိုးပဲ့သော စိတ်ပေတည်း၊၊ အိုဘုရားသခင် ကိုယ်တော်သည်ကျိုးပဲ့ကြေမွသော နှလုံးကို ငြင်းပယ်တော် မမူတတ်ပါ၊၊

၁၈

စေတနာစိတ်တော်ရှိ၍ ဇိအုန်တောင်ကို ကျေးဇူးပြုတော်မူပါ၊ ယေရုရှလင်မြို့ရိုးကို တည်စေတော်မူပါ။

၁၉

ထိုအခါ တရားသဖြင့် ပူဇော်သောယဇ်၊ မီးရှို့သောယဇ်၊ တကိုယ်လုံး မီးရှို့သော ယဇ်နှင့် မွေ့လျော်တော်မူလိမ့်မည်။ ထိုအခါ ယဇ်ပလ္လင်တော် ပေါ်မှာ နွားလားတို့ကို ယဇ်ပူဇော် ကြပါလိမ့်မည်၊၊

_________________________
Footnotes

၁၁

(a) ဓမ္မာဟောင်းကာလ၌ သန့်ရှင်းသော ဝိညာဉ်တော်ကို ဣသရေလ ရှင်ဘုရင်များ၊ ယဇ်ပုရောဟိတ်များ၊ ပရောဖက်များနှင့် ဘုရား အသုံးပြုသော လူများထံ၌ သာလျှင်ပေး၍၊ သူတို့အပြစ်လုပ်လျှင် ပြန်ရုပ်သိမ်းသွားတတ်သည်။ ဥပမာရှောလုနှင့် ရှံဆုန်ထံမှ ဝိညာဉ်တော်ထွက်သွားသည်။ ထို့ကြောင့် ဒါဝိဒ်မင်းလည်း အပြစ်ကျူးလွန်သောအခါ၊ သူ့ထံမှ ဝိညာဉ်တော် ရုပ်သိမ်းသွားမှာ ကိုကြောက်၍၊ မရုပ်သိမ်းပါမည့်အကြောင်း ဆုတောင်းသည်။ ဓမ္မသစ်ကာလတွင် သန့်ရှင်းသော ဝိညာဉ်တော်ကို ယုံကြည်သူတိုင်းထံ၌ ပေး၍ (ဧဖက် ၁း၁၃) ရွေးနှုတ်ခြင်း နေ့ရက်တိုင်အောင် တံဆိပ်ခပ်သောကြောင့်၊ အပြစ်ကျူးလွန်သောအခါ မရုပ်သိမ်းတော့ဘဲ စိတ်နာစေသည် (ဧဖက် ၄း၃၀)။ ထို့ကြောင့် ဝိညာဉ်တော် စိတ်မနာစေဘို့ရန် အပြစ်ကို နောင်တရ၍ အသက်တာကို ပြုပြင်ဘို့လိုသည်။