ယေရမိ မြည်တမ်းစကား

အခန်းကြီး ၃

၁ ငါသည်ဘုရားသခင်၏အမျက်တော်ကြိမ်လုံးအောက်၌ ဆင်းရဲခြင်းကိုခံရသောသူဖြစ်၏။ ၂ ငါ့ကိုသွေးဆောင်၍ အလင်းသို့မပို့၊ မှောင်မိုက်ထဲသို့ပို့ဆောင်တော်မူ၏။ ၃ အကယ်စင်စစ်ငါ့ကိုတနေ့လုံးအထပ်ထပ်ဒဏ်ခတ်တော်မူ၏။ ၄ ငါ့အရေနှင့်အသားကိုဆွေးရိစေ၍၊ ငါ့အရိုးတို့ကိုလည်းချိုးတော်မူ၏။ ၅ ငါ့တဘက်၌ တပ်တည်၍ခါးသောအရာ၊ ပင်ပန်းစရာအကြောင်းတို့နှင့်ဝိုင်းတော်မူ၏။ ၆ သေလွန်သောသူတို့ကိုပြုတတ်သကဲ့သို့၊ ငါ့ကိုမိုက်သောအရပ်သို့ထားတော်မူ၏။ ၇ ငါမထွက်နိုင်အောင်ဝင်းခတ်၍လေးသောသံကြိုးနှင့်ချည်နှောင်တော်မူ၏၊ ၈ ထိုမျှမကငါသည်ကြွေးကြော်အော်ဟစ်၍ဆုတောင်းသော်လည်းငြင်းပယ်တော်မူ၏။ ၉ ငါသွားရာလမ်းကိုကျောက်ထရံနှင့်ပိတ်၍ကောက်သောလမ်းဖြင့် သွားစေတော်မူ၏။ ၁၀ ငါ့ကိုချောင်းမြောင်းသောဝက်ဝံကဲ့သို့၎င်း၊ မထင်ရှားသောအရပ်၌ နေသောခြင်္သေ့ကဲ့သို့၎င်း၊ ဖြစ်တော်မူ၏။ ၁၁ ငါ့ကိုလမ်းလွဲစေပြီးလျှင်အပိုင်းပိုင်းဖြတ်၍ဖျက်ဆီးတော်မူ၏။ ၁၂ လေးတော်ကိုတင်၍ပစ်စရာစက်အရာ၌ ငါ့ကိုထားတော်မူ၏။ ၁၃ မြှားတော်တို့ကိုလည်းငါ့ကျောက်ကပ်ကိုခွင်းစေတော်မူ၏။ ၁၄ ငါသည်ငါ၏လူတို့တွင်ကဲ့ရဲ့စရာအကြောင်းနှင့်တနေ့လုံးသီချင်းဆိုစရာအကြောင်းဖြစ်ပါသည်တကား။ ၁၅ ခါးသောဆေးနှင့်ငါ့ကိုဖြည့်၍၊ ဒေါနနှင့်ယဇ်မူးစေတော်မူ၏။ ၁၆ ကျောက်စရစ်ကိုကျွေး၍ငါ့သွားတို့ကိုချိုးတော်မူ၏။ မီးဖိုပြာနှင့်ဖုံးအုပ်တော်မူ၏။ ၁၇ ငါ၏ဝိညာဉ်ကိုချမ်းသာနှင့်ဝေးစွာရွေ့တော်မူသောကြောင့်၊ ငါသည်မင်္ဂလာအကြောင်းကိုမေ့လျော့၏။ ၁၈ သို့ဖြစ်၍ငါသည် ထာဝရဘုရားရှေ့တော်၌ အစွမ်းသတ္တိနှင့်မြော်လင့်စရာအကြောင်းပျက်လေပြီဟုဆိုရ၏။

၁၉ အ​ကျွန်ုပ်ခံရသောဆင်းရဲငြိုငြင်ခြင်းကို၎င်း၊ ဒေါနနှင့်သည်းခြေအရည်ကို၎င်းအောက်မေ့တော်မူပါ။ ၂၀ ဧကန်အမှန်အောက်မေ့တော်မူလိမ့်မည်။ ၂၁ ထိုသို့အ​ကျွန်ုပ်၏စိတ်နှလုံးသည်ဆင်ခြင်၍သတိရှိသောအခါမြော်လင့်စရာအခွင့်ရှိပါ၏။ ၂၂ ထာဝရဘုရားသည်သနားတော်မူ၍ကရုဏာတော်သည်မကုန်သောကြောင့်၊ ငါတို့သည်ဆုံးရှုံးခြင်းသို့မရောက်ဘဲနေကြ၏။ ၂၃ နံနက်တိုင်းကရုဏာတော်အသစ်ကိုခံရကြ၏။ သစ္စာတော်သည်ကြီးမြတ်ပါ၏။ ၂၄ ငါ့ဝိညာဉ်၏သဘော ဟူမူကား၊ ထာဝရဘုရားသည်ငါ၏အဘို့ဖြစ်တော်မူ၏။ ထို့ကြောင့်ကိုယ်တော်ကိုငါမြော်လင့်ပါ၏။ ၂၅ ကိုယ်တော်ကိုမြော်လင့်သောသူနှင့်ကိုယ်တော်ကိုရှာသောသူ၏စိတ်ဝိညာဉ်အားထာဝရဘုရားကျေးဇူးပြုတော်မူ၏။ ၂၆ ကယ်တင်တော်မူမည်ဟုမြော်လင့်လျက်ငြိမ်ဝပ်စွာစောင့်၍နေကောင်း၏။ ၂၇ လူသည်အသက်ပျိုစဉ်အခါထမ်းပိုးကိုထမ်းကောင်း၏။ ၂၈ ထမ်းပိုးကိုတင်တော်မူသောကြောင့်တယောက်တည်းထိုင်၍ငြိမ်ဝပ်စွာနေစေ။ ၂၉ မြော်လင့်စရာအခွင့်ရှိကောင်းရှိလိမ့်မည်ဟုထင်လျက်၊ မိမိနှုတ်ကိုမြေမှုန့်၌ ကပ်စေ။ ၃၀ ရိုက်သောသူအားမိမိပါးကိုပေး၍၊ ကဲ့ရဲ့ပြစ်တင်ခြင်းနှင့်ပြည့်ဝစေ။၃၁ အကြောင်းမူကားထာဝရဘုရားသည်အစဉ်စွန့်ပစ်တော်မမူတတ်။ ၃၂ ဝမ်းနည်းစေတော်မူသော်လည်း၊ ကရုဏာတော်များ ပြားသည်နှင့်အညီသနားတော်မူလိမ့်မည်။ ၃၃ ဆင်းရဲစေချင်သောစိတ်နှင့်လူသားတို့ကိုညှဉ်းဆဲ၍၊ ဝမ်းနည်းစေတော်မူသည် မဟုတ်။ ၃၄ ချုပ်ထားသောပြည်သားအပေါင်းတို့ကို​ခြေနှင့်နင်းကြိတ်ခြင်းအမှု၊ ၃၅ လူခံထိုက်သောတရားကိုအမြင့်ဆုံးသောဘုရားမျက်မှောက်၌ ဖျက်ခြင်းအမှု၊ ၃၆ သူတပါးကိုမတရားသဖြင့်ရှုံးစေခြင်းအမှုတို့ကိုထာဝရဘုရားနှစ်သက်တော်မမူ။ ၃၇ ထာဝရဘုရားမှာထားတော်မမူဘဲ၊ အဘယ်သူသည်ပြော၍တစုံတခုကိုဖြစ်စေနိုင်သနည်း၊ ၃၈ အမြင့်ဆုံးသောဘုရား၏နှုတ်တော်ထွက်ရှိသည်အတိုင်း၊ မင်္ဂလာနှင့်အမင်္ဂလာဖြစ်တတ်သည်မဟုတ်လော။ ၃၉ အသက်ရှင်သောလူသတ္တဝါသည်အဘယ်ကြောင့်မြည်တမ်းရမည်နည်း။ မိမိဒုစရိုက်အပြစ်ကြောင့်မြည်တမ်းရမည်လော။ ၄၀ ငါတို့သည်ကိုယ်လိုက်သောလမ်းတို့ကိုစစ်ကြောစုံစမ်း၍၊ [A] ထာဝရဘုရားထံတော်သို့ပြန်သွားကြကုန်အံ့။ ၄၁ ကောင်းကင်ဘုံ၌ ရှိတော်မူသောဘုရားသခင်ထံတော်သို့နှလုံးနှင့်လက်တို့ကိုချီကြွကြကုန်အံ့။ ၄၂ အ​ကျွန်ုပ်တို့သည်ပြစ်မှားပုန်ကန်မိပါပြီ။ ကိုယ်တော်သည်အပြစ်လွှတ်တော်မမူပါ။ ၄၃ အမျက်တော်ထွက်၍မျက်နှာလွှဲတော်မူ၏။ တဖန်အ​ကျွန်ုပ်တို့ကိုလိုက်၍ ကရုဏာမရှိဘဲကွပ်မျက်တော်မူ၏။ ၄၄ အ​ကျွန်ုပ်တို့၏ပဌနာစကားသည်အထံတော်သို့မပေါက်နိုင်အောင် မိုးတိမ်ဖြင့်ကိုယ်ကိုကွယ်ကာတော်မူ၏။ ၄၅ အ​ကျွန်ုပ်တို့ကိုလူမျိုးတို့တွင်လှည်းပစ်သောတန်မြက်ချေးအမှိုက်ကဲ့သို့၎င်း၊ [B] ရွံစရာအရာကဲ့သို့၎င်း၊ ဖြစ်စေတော်မူ၏။ ၄၆ ရန်သူအပေါင်းတို့သည်အ​ကျွန်ုပ်တို့တဘက်၌ နှုတ်ကိုဖွင့်ကြပါ၏။ ၄၇ အ​ကျွန်ုပ်တို့သည်ကြောက်လန့်ဘွယ်သောအရာထဲသို့၎င်း၊ တွင်းထဲသို့၎င်း၊ သုတ်သင်ပယ်ရှားဖျက်ဆီးခြင်းထဲသို့၎င်း၊ ရောက်ကြပါပြီ။ ၄၈ ငါ၏လူမျိုးသတို့သမီးပျက်စီးသောကြောင့်၊ ငါ့မျက်စိသည်မြစ်ရေဖြစ်၍စီးလျက်ရှိ၏။ ၄၉ ထာဝရဘုရားသည် ကောင်းကင်ကငုံ့ကြည့်၍ရှုမှတ်တော်မမူမှီတိုင်အောင်၊ ၅၀ ငါ့မျက်ရည်သည်ကျ၍အစဉ်မပြတ်ယိုစီးလျက်ရှိ၏၊ ၅၁ ငါ၏မြို့သမီးအပေါင်းတို့အတွက်ကြောင့်ငါ့မျက်စိသည်ငါ့နှလုံးကိုပူစေတတ်၏။ ၅၂ အကြောင်းမရှိဘဲငါ့ကိုရန်ပြုသောသူတို့သည်ငှက်ကိုလိုက်၍ ရှာသကဲ့သို့ငါ့ကိုလိုက်၍ရှာကြ၏။ ၅၃ မြေကြီးတွင်း၌ ငါ့အသက်ကိုဖြတ်၍ငါ့အပေါ်မှာကျောက်ကိုတင်ထားကြ၏။ ၅၄ ငါ့ခေါင်းကိုရေလွှမ်းမိုးသည်ဖြစ်၍၊ ငါသည်ဆုံးရှုံးပြီဟုဆိုရ၏။ ၅၅ အိုထာဝရဘုရားနက်သောမြေတွင်းထဲကအ​ကျွန်ုပ်သည်ကိုယ်တော်၏နာမကိုခေါ်ပါ၏။ ၅၆ အ​ကျွန်ုပ်ခေါ်သံကိုကြားတော်မူသည်ဖြစ်၍၊ အ​ကျွန်ုပ်ညည်းတွားအော်ဟစ်သောအခါနားတော်ကိုလွှဲတော်မမူပါနှင့်။ ၅၇ အ​ကျွန်ုပ်သည် ကိုယ်တော်ကိုဟစ်အော်သောအခါ၊ ကိုယ်တော်သည်ချဉ်းကပ်တော်မူ၍မကြောက်နှင့်ဟုမိန့်တော်မူပြီ။ ၅၈ အိုထာဝရဘုရား၊ ကိုယ်တော်သည်အ​ကျွန်ုပ်အသက်နှင့်ဆိုင်သောအမှုကိုစောင့်၍ရွေးနှုတ်တော်မူပြီ။ ၅၉ အိုထာဝရဘုရားကိုယ်တော်သည်အ​ကျွန်ုပ်ခံရသောညှဉ်းဆဲခြင်းကိုမြင်တော်မူပြီ။ အ​ကျွန်ုပ်အဘို့တရားစီရင်တော်မူပါ။ ၆၀ သူတို့သည်အ​ကျွန်ုပ်ကိုရန်ငြိုးဖွဲ့သမျှနှင့်မကောင်းသောအကြံရှိသမျှကိုကိုယ်တော်မြင်တော်မူပြီ။ ၆၁ အိုထာဝရဘုရားသူတို့ကဲ့ရဲ့သောအကြောင်းနှင့်မကောင်းသောအကြံရှိသမျှကို၎င်း၊ ၆၂ အ​ကျွန်ုပ်တဘက်၌ ထသောသူတို့၏အပြစ်တင်ခြင်း၊ အ​ကျွန်ုပ်တဘက်၌ တနေ့လုံးကြံစည်ခြင်းကို၎င်း၊ ကိုယ်တော်ကြားတော်မူပြီ။၆၃ သူတို့ထိုင်ခြင်း၊ ထခြင်းကိုကြည့်ရှုတော်မူပါ။ အ​ကျွန်ုပ်သည်သူတို့သီချင်းဆိုစရာအကြောင်းဖြစ်ပါ၏။ ၆၄ အိုထာဝရဘုရားသူတို့ကျင့်သောအကျင့်နှင့်အလျောက်အကျိုးအပြစ်ကိုဆပ်ပေးတော်မူပါ။ ၆၅ သူတို့စိတ်နှလုံးကိုခိုင်မာစေ၍ကျိန်တော်မူပါ။ ၆၆ အမျက်တော်ထွက်၍သူတို့ကိုညဉ်းဆဲသဖြင့်၊ ထာဝရဘုရား၏မိုးကောင်းကင်အောက်မှသုတ်သင်ပယ်ရှားတော်မူပါ။