ယေရမိ အနာဂတ္တိ

အခန်းကြီး ၅၀

၁ ထာဝရဘုရားသည် ဗာဗုလုန်မြို့နှင့် ခါလဒဲပြည်ကို ရည်မှတ်၍၊ ပရောဖက်ယေရမိအားဖြင့် မိန့်တော်မူသောစကားတည်းဟူမူကား၊ ၂ လူမျိုးတို့တွင် သိတင်းကြားပြောကြလော့။ ဝှက်၍မထားဘဲ အလံကိုထူ၍ ကြော်ငြာကြလော့။ ကြားပြောရသော စကားဟူမူကား၊ ဗာဗုလုန်မြို့ကို တိုက်ယူကြပြီ။ ဗေလဘုရားသည် အရှက်ကွဲပြီ။ မေရောဒပ်ဘုရားသည် ကျိုးပြီ။ ဗာဗုလုန်ရုပ်တု ဆင်းတုတို့သည် အရှက်ကွဲ၍ ကျိုးပဲ့လျက်ရှိကြ၏။ ၃ လူတမျိုးသည် မြောက်မျက်နှာမှ လာ၍ဗာဗုလုန်ပြည်ကို သုတ်သင်ပယ် ရှားလိမ့်မည်။ [A] နေသောသူမရှိရ၊ တိရစ္ဆာန်တို့သည် အကုန်အစင် ထွက်သွားကြလိမ့်မည်။

၄ ထာဝရဘုရားမိန့်တော်မူသည်ကား၊ ထိုကာလအခါ ဣသရေလအမျိုးသားတို့သည် ယုဒအမျိုးသားတို့နှင့်ပေါင်းဘက်၍ လာကြလိမ့်မည်။ မျက်ရည်ကျလျက်၊ ခရီးသွားလျက်၊ သူတို့၏ဘုရားသခင်ထာဝရဘုရားကို သွား၍ရှာကြလိမ့်မည်။ ၅ ဇိအုန်မြို့သို့မျက်နှာပြု၍ လမ်းကိုရှာကြလိမ့်မည်။ အစဉ်မမေ့လျော့ရသေ ာပဋိညာဉ်အားဖြင့် ထာဝရဘုရားထံတော်သို့ချဉ်းကပ်၍ မိဿဟာယဖွဲ့ကြလိမ့်မည်။

၆ ငါ၏လူတို့သည် ပျောက်သောသိုးများ ဖြစ်ကြပြီ။ သိုးထိန်းတို့သည် တောင်များပေါ်မှာ လမ်းလွဲစေကြပြီ။ ၇ သူတို့ကို တွေ့ကြုံရသမျှသောသူတို့သည် ကိုက်စားကြပြီ။ ရန်သူတို့က သူတို့သည်တရားသောငြိမ်ဝပ်ရာ၊ ဘိုးဘေးတို့ခိုလှုံရာထာဝရဘုရားကို ပြစ်မှားသောကြောင့် ငါတို့သည်ကိုက်စားသော်လည်း မလွန်ကျူးဟုပြောဆိုကြပြီ။

၈ ဗာဗုလုန်မြို့ထဲက ပြေးကြလော့။ ခါလဒဲပြည်မှ ထွက်သွားကြလော့။ သိုးစုရှေ့၌ သိုးထီးကဲ့သို့ပြုကြလော့။ ၉ အကြောင်းမူကား၊ မြောက်မျက်နှာအရပ်၌ ကြီးစွာသောတိုင်းနိုင်ငံအစုအဝေးကိုငါနှိုးဆော်၍၊ ဗာဗုလုန်မြို့သို့ဆောင်ခဲ့မည်။ သူတို့ သည်မြို့တဘက်၌ တပ်ခင်းကျင်း၍တိုက်ယူကြလိမ့်မည်။ သူတို့ပစ်သောမြှားတို့သည်လိမ္မာသောစစ်သူရဲ၏မြှားကဲ့သို့ဖြစ်၍မမှန်ဘဲမနေရ။ ၁၀ ခါလဒဲပြည်သည်လုယူရာဖြစ်၍၊ လုယူသောသူတို့သည်ဝကြလိမ့်မည်ဟုထာဝရဘုရားမိန့်တော်မူ၏။ ၁၁ ငါ၏အမွေကိုဖျက်ဆီးသောသူတို့၊ သင်တို့သည်ဝမ်းမြောက်ရွှင်လန်းကြပြီ။ ကျက်စားသောနွားမကဲ့သို့ခုန်ကြပြီ။ မြင်းထီးကဲ့သို့ဟီကြပြီ။ ၁၂ ထိုကြောင့်၊ သင်တို့အမိသည်မိန်းမောတွေဝေလိမ့်မည်။ သင်တို့ကိုမွေးဖွားသောသူသည်အရှက်ကွဲလိမ့်မည်။ ပြည်တကာတို့တွင်အယုတ်ဆုံးသောပြည်၊ သုတ်သင်သောအရပ်၊ သွေ့​ခြောက်သောလွင်ပြင်ဖြစ်ရလိမ့်မည်။ ၁၃ ထာဝရ ဘုရား၏အမျက်တော်ကြောင့်နောက်တဖန်လူမနေရ။ ဆိတ်ညံသောအရပ်သက်သက်ဖြစ်ရလိမ့်မည်။ ဗာဗုလုန်မြို့နားမှာလျှောက်သွားသောသူတိုင်းအံ့ဩ၍၊ သူခံရသောဘေးဥပဒ်ကိုထောက်လျက်၊ ကဲ့ရဲ့သံကိုပြုကြလိမ့်မည်။ ၁၄ ဗာဗုလုန်ပတ်လည်၌ တပ်ခင်းကျင်းကြလော့။ သူသည်ထာဝရဘုရားကိုပြစ်မှားသောကြောင့်၊ လေးသမားအပေါင်းတို့၊ မြှားကိုမနှမြောဘဲပစ်ကြလော့။ ၁၅ မြို့ပတ်လည်၌ ကြွေးကြော်ကြလော့။ သူသည်ဝန်ချပြီ။ မြို့ရိုးနှင့်ပြအိုးတို့သည်ပြိုလဲကြပြီ။ ထာဝရဘုရား၏အမျက်တော်ပြေခြင်းအမှုဖြစ်၍၊ သူ့ကိုအပြစ်နှင့်အလျောက်စီရင်ကြလော့။ သူသည်ပြုဘူးသည်အတိုင်းသူ၌ ပြုကြလော့။ ၁၆ ဗာဗုလုန်မြို့၌ မျိုးစေ့ကြဲသောသူနှင့်စပါးရိတ်သောသူတို့ကိုပယ်ဖြတ်ကြလော့။ ညှဉ်းဆဲတတ်သောဓါးကိုကြောက်သောကြောင့်၊ အသီးအသီးတို့သည်မိမိတို့လူမျိုးနေရာသို့ပြန်သွား၍၊ မိမိတို့ပြည်သို့ပြေးကြလိမ့်မည်။

၁၇ ဣသရေလသည်အရပ်ရပ်သို့လွင့်ပြေးရသောသိုးဖြစ်၏။ ခြင်္သေ့တို့သည်နှောင့်ယှက်ကြပြီ။ အာရှုရိရှင်ဘုရင်သည်ရှေ့ဦးစွာကိုက်စားပြီ။ နောက်မှဗာဗုလုန်ရှင်ဘုရင်နေဗုခဒ်နေဇာသည်သူ၏အရိုးတို့ကိုချိုးဖဲ့ပြီ။ ၁၈ ထိုကြောင့်၊ ဣသရေလအမျိုး ၏ဘုရားသခင်၊ ကောင်းကင်ဗိုလ်​ခြေအရှင်ထာဝရဘုရားမိန့်တော်မူသည်ကား၊ ငါသည်အာရှုရိရှင်ဘုရင်ကိုဒဏ်ပေးသည်နည်းတူ၊ ဗာဗုလုန်ရှင်ဘုရင်နှင့်သူ၏နိုင်ငံကိုဒဏ်ပေးမည်။ ၁၉ ဣသရေလကိုသူ၏နေရင်းအရပ်သို့ငါဆောင်ခဲ့ဦးမည်။ သူသည်ကရမေလတောင်နှင့်ဗာရှန်တောင်ပေါ်မှာကျက်စား၍၊ ဧဖရိမ်တောင်နှင့်ဂိလဒ်တောင်ပေါ်မှာဝလိမ့်မည်။ ၂၀ ထိုကာလအခါဣသရေလအပြစ်ကိုစစ်ကြောသော်လည်းအပြစ်မပေါ်ရာ။ ယုဒဒုစရိုက်တို့ကိုရှာ၍မတွေ့ရာ။ ငါချန်ထားသောသူတို့၏အပြစ်ကိုငါ​ဖြေရှင်းမည်ဟုထာဝရဘုရားမိန့်တော်မူ၏။

၂၁ ပုန်ကန်တတ်သောပြည်၊ ဆုံးမအပ်သောပြည်သားတို့ရှိရာသို့စစ်ချီကြလော့။ သုတ်သင်ပယ်ရှင်း၍သူတို့အမျိုးအနွယ်ကို အကုန်အစင်ဖျက်ဆီးကြလော့။ ငါမှာထားသမျှအတိုင်းပြုကြလော့ ၊ ဟုထာဝရဘုရားမိန့်တော်မူ၏၊ ၂၂ ထိုပြည်၌ စစ်တိုက်ခြင်းငှါအသံ၊ ကြီးစွာသောဖျက်ဆီးခြင်းအသံကိုကြားရ၏။ ၂၃ မြေတပြင်လုံးကိုရိုက်နှက်သောသံတူသည်ကျိုးပြတ်လေပြီတကား၊ ဗာဗုလုန်မြို့သည်လူမျိုးတို့တွင်အံ့ဩရာဖြစ်လေပြီတကား။ ၂၄ အိုဗာဗုလုန်မြို့၊ သင့်အဘို့ကျော့ကွင်းကိုငါထောင် ထားသဖြင့်၊ သင်သည်သတိလစ်၍ကျော့မိပြီ။ ထာဝရဘုရား၏အာဏာတော်ကိုဆန်သောကြောင့်ရန်သူတွေ့၍တိုက်ယူပြီ။၂၅ ထာဝရဘုရားသည်လက်နက်တိုက်တော်ကိုဖွင့်၍၊ အမျက်တော်လက်နက်တို့ကိုထုတ်တော်မူပြီ။ ဤအမှုကား၊ ကောင်း ကင်ဗိုလ်​ခြေအရှင်ထာဝရဘုရားသည်၊ ခါလဒဲပြည်၌ ပြုတော်မူသောအမှုပေတည်း။ ၂၆ မြို့တဘက်မှတဘက်တိုင်အောင် တိုက်ကြလော့။ စပါးကျီတို့ကိုဖွင့်၍စပါးပုံများကဲ့သို့ပုံထားလျက်၊ အလျှင်းမကြွင်းစေခြင်းငှါရှင်းရှင်းဖျက်ဆီးကြလော့။ ၂၇ သူ၏နွားဥသဘ(နွားထီး)ရှိသမျှတို့ကိုသတ်ကြလော့။ သတ်ရာအရပ်သို့ဆင်းသွားစေကြလော့။ သူတို့သည်အမင်္ဂလာရှိကြ၏။ အကယ်စင်စစ်သူတို့အချိန်၊ ဆုံးမခြင်းကိုခံရသောအချိန်ရောက်လေပြီ။ ၂၈ ငါတို့ဘုရားသခင်ထာဝရဘုရား၏အမျက်တော်ပြေခြင်း၊ ဗိမာန်တော်ကိုဖျက်ဆီးသောအပြစ်နှင့်အလျောက်ဒဏ်ပေးခြင်း၊ သိတင်းကိုဇိအုန်မြို့၌ ကြားပြောအံ့သောငှါ၊ ဗာဗုလုန်ပြည်မှာပြေးလွတ်သောသူတို့၏အသံကိုကြားရ၏။ ၂၉ လေးသမားတို့ကိုဗာဗုလုန်မြို့သို့ခေါ်ကြလော့။ ပစ်တတ်သောသူအပေါင်းတို့၊ မြို့ပတ်ဝန်းကျင်၌ တပ်ချကြလော။ မြို့သူမြို့သားတယောက်ကိုမျှမလွတ်စေနှင့်။ ထိုမြို့ကျင့်သောအကျင့်နှင့်အလျောက်အပြစ်ပေးကြလော့။ သူပြုဘူးသမျှအတိုင်းသူ၌ ပြုကြလော့။ သူသည်ဣသရေလအမျိုး၏သန့်ရှင်းတော်မူသောဘုရား၊ ထာဝရဘုရား၏တဘက်၌ ဝါကြွားပြီတကား။ ၃၀ ထိုကြောင့်၊ မြို့သားလုလင်တို့သည်လမ်းမတို့၌ လဲနေ၍၊ ထိုနေ့တွင်စစ်သူ ရဲအပေါင်းတို့သည်ဆုံးရှုံးကြလိမ့်မည်ဟုထာဝရဘုရားမိန့်တော်မူ၏။ ၃၁ ကောင်းကင်ဗိုလ်ခြေသခင်အရှင်ထာဝရဘုရားမိန့်တော်မူသည်ကား၊ အိုမာနကြီးသောသူ၊ သင့်တဘက်၌ ငါနေ၏။ အကယ်စင်စစ်သင်၏အချိန်၊ ဆုံးမခြင်းကိုခံရသောအချိန်ရောက်လေပြီ။ မာနကြီးသောသူသည်ထိမိ၍လဲပြီးမှအဘယ်သူမျှမကြွရ။ ငါသည်လည်းသူ့နေရာမြို့တို့ကိုမီးရှို့၍သူပတ်လည်၌ နေသောသူအပေါင်းတို့ကိုလောင်လိမ့်မည်ဟုမိန့်တော်မူ၏။

၃၃ ကောင်းကင်ဗိုလ်​ခြေအရှင်ထာဝရဘုရားမိန့်တော်မူသည်ကား၊ ဣသရေလအမျိုးသားတို့နှင့်တကွယုဒပြည်အမျိုးသားတို့သည်ညှဉ်းဆဲခြင်းကိုခံရကြပြီ။ သူတို့ကိုသိမ်းသွားသောသူရှိသမျှတို့သည်ချုပ်ထားပြီးလျှင်၊ ငါတို့သည်မလွှတ်ဟုငြင်းပယ်လျက်နေကြပြီ။ ၃၄ သို့ရာတွင်၊ သူတို့ကိုရွေးနှုတ်သောသခင်သည်အားကြီး၏။ ကောင်းကင်ဗိုလ်​ခြေအရှင်ထာဝရဘုရား တည်းဟူသောဘွဲ့နာမရှိတော်မူ၏။ ထိုသခင်သည်သူတို့အမှုကိုကျပ်တည်းစွာစောင့်၍ပြည်တော်ကိုငြိမ်ဝပ်စေလျက်၊ ဗာဗုလုန်မြို့သူမြို့သားတို့ကိုနှောင့်ယှက်လျက်ပြုတော်မူမည်။ ၃၅ ထာဝရဘုရားမိန့်တော်မူသည်ကား၊ ဓါးဘေးသည်ခါလဒဲပြည်သူ၊ ဗာဗုလုန်မြို့သားတို့နှင့်တကွမင်းများ၊ ပညာရှိများအပေါ်သို့သင့်ရောက်လိမ့်မည်။ ၃၆ ဓါးဘေးသည်မိစ္ဆာဆရာတို့အပေါ်သို့ ရောက်၍၊ သူတို့သည်အရူးဖြစ်ကြလိမ့်မည်။ ဓါးဘေးသည်ထိုမြို့သားစစ်သူရဲတို့အပေါ်သို့ရောက်၍၊ သူတို့သည်စိတ်ပျက်ကြလိမ့်မည်။ ၃၇ ဓါးဘေးသည်မြင်းများ၊ ရထားများ၊ မြို့ထဲမှာနေသောလူအမျိုးမျိုးရှိသမျှတို့အပေါ်သို့ရောက်၍၊ သူတို့သည်မိန်းမ ကဲ့သို့ဖြစ်ကြလိမ့်မည်။ ဓါးဘေးသည်မြို့ဘဏ္ဍာအပေါ်သို့ရောက်၍ရန်သူတို့သည်လုယူကြလိမ့်မည်။ ၃၈ ခန်း​ခြောက်ခြင်းဘေးသည်မြို့၏ရေတို့အပေါ်သို့ရောက်၍ခန်း​ခြောက်လိမ့်မည်။ အကြောင်းမူကား၊ ထိုပြည်သည်ရုပ်တုတို့နှင့်အပြည့်ရှိ၏။ ပြည်သားတို့သည်ဆင်းတုတို့ကိုအမှီပြု၍ဝါကြွားကြ၏။ ၃၉ ထိုကြောင့်၊ တောသားရဲတို့သည်တောခွေးတို့နှင့်တကွထိုမြို့၌ နေကြလိမ့်မည်။ ကုလားအုပ်ငှက်တို့သည်လည်းနေရာကျလိမ့်မည်။ နောက်တဖန်အဘယ်သူမျှမနေရ။ ကာလအစဉ်အဆက်လူနေရာမဖြစ်ရ။ ၄၀ သောဒုံမြို့နှင့်ဂေါမရမြို့မှစ၍နီးစပ်သောမြို့များကိုဘုရားသခင်ဖျက်ဆီးတော်မူသဖြင့်လူဆိတ်ညံသကဲ့သို့၊ ဗာဗုလုန်မြို့၌ အဘယ်သူမျှမနေရ၊ လူသားတစုံတယောက်မျှနေရာမကျရ ၊ ဟုထာဝရဘုရားမိန့်တော်မူ၏။

၄၁ ကြည့်ရှုလော့။ လူမျိုးတမျိုးသည်မြောက်မျက်နှာမှလာ၏။ ကြီးစွာသောလူမျိုးနှင့်များစွာသောရှင်ဘုရင်တို့သည်မြေ ကြီးစွန်းတို့မှပေါ်လာကြ၏။ ၄၂ လေးနှင့်လှံတို့ကိုလက်စွဲကြ၏။ ကြမ်းကြုတ်သောအမျိုးဖြစ်၍သနားခြင်းကရုဏာမရှိ။ သူတို့စကားသံသည်သမုဒ္ဒ​ရာမြည်သံကဲ့သို့ဟုန်းတတ်၏။ အိုဗာဗုလုန်သတို့သမီး၊ စစ်သူရဲကဲ့သို့တပ်ခင်းကျင်းလျက်မြင်းစီး၍သင်ရှိရာသို့ချီလာကြလိမ့်မည်။ ၄၃ သူတို့၏သိတင်းကိုဗာဗုလုန်ရှင်ဘုရင်သည်ကြား၍လက်အားလျော့၏။ ဒုက္ခဆင်းရဲကို၎င်း၊ သားဖွားသောမိန်းမခံရသကဲ့သို့ပြင်းစွာသောဝေဒနာကို၎င်းခံရ၏။ ၄၄ ခြင်္သေ့သည်ယော်ဒန်မြစ်၏ဂုဏ်အသရေမှတက်သ ကဲ့သို့၊ ရန်သူသည်ကျောက်နှင့်ပြည့်စုံသောနေရာသို့တက်သောအခါနေသောသူသည်ချက်ချင်းပြေးမည်အကြောင်းကိုငါပြုမည်။ ရွေးချယ်သောသူကိုလည်းဗာဗုလုန်မြို့အပေါ်မှာငါခန့်ထားမည်။ ငါနှင့်အဘယ်သူတူသနည်း။ ငါအချိန်ကိုအဘယ်သူချိန်းချက်မည်နည်း။ အဘယ်မည်သောသိုးထိန်းသည်ငါရှေ့မှာရပ်နိုင်သနည်း။ ၄၅ သို့ဖြစ်၍၊ ထာဝရဘုရားသည်ဗာဗုလုန်မြို့တဘက်၌ ကြံစည်တော်မူသောအကြံ၊ ခါလဒဲပြည်တဘက်၌ ကြံစည်တော်မူသောအကြံတို့ကိုနားထောင်ကြလော့။ အကယ်စင်စစ်ရန်သူသည်အားမရှိသောထိုသိုးတို့ကိုလုယက်လိမ့်မည်။ အကယ်စင်စစ်သူတို့ရှိရာသို့လာ၍ကျက်စားရာအရပ်ကိုဖျက်ဆီးလိမ့်မည်။ ၄၆ ဗာဗုလုန်မြို့ကိုတိုက်ယူသောအသံကြောင့်မြေကြီးလှုပ်ရှား၏။ အော်ဟစ်သောအသံကိုလူအမျိုးမျိုးတို့သည်ကြားရကြ၏။