ဟေရှာယ အနာဂတ္တိ

အခန်းကြီး ၁၄

၁ အကြောင်းမူကား၊ ထာဝရဘုရားသည်ယာကုပ်အမျိုးကိုသနား၍၊ ဣသရေလအမျိုးကိုတဖန်ရွေးကောက်သဖြင့်၊ သူတို့ကို နေရင်းပြည်၌ နေရာချတော်မူလိမ့်မည်။ ၂ တ​ကျွန်းတနိုင်ငံသားတို့သည်သူတို့နှင့်ပေါင်းဖေါ်၍၊ ယာကုပ်အမျိုး၌ ဆည်းကပ်ကြလိမ့်မည်။ တပါးအမျိုးသားတို့သည်သူတို့ကိုနေရင်းအရပ်သို့ပို့ဆောင်ကြလိမ့်မည်။ ဣသရေလအမျိုးသားတို့သည်တပါးအမျိုး သားတို့ကိုထာဝရဘုရား၏ပြည်တော်တွင်၊ ​ကျွန်နှင့်​ကျွန်မအရာ၌ ထား၍စေစားကြလိမ့်မည်။ အထက်ကသိမ်းသွားဘူးသောသူတို့ကိုတဖန်သိမ်းယူခဲ့လိမ့်မည်။ ညှဉ်းဆဲဘူးသောသူတို့ကိုလည်းအုပ်စိုးကြလိမ့်မည်။

၃ ထိုအခါထာဝရဘုရားသည်သင့်ကိုငြိုငြင်ခြင်း၊ စိုးရိမ်ခြင်း၊ သူတပါးစေစား၍ဆင်းရဲစွာအစေ​ကျွန်ခံရခြင်းထဲကနှုတ်၍၊ ချမ်းသားပေးတော်မူလျှင်၊ ၄ သင်သည်ဗာဗုလုန်ရှင်ဘုရင်ကိုရည်ဆောင်၍၊ ပုံစကားကိုဤသို့မြွက်ဆိုလိမ့်မည်၊ အစိုးတရပြုသောသူသည်ဆုံးလေပြီတကား။ ရွှေမြို့တော်သည်ဆုံးလေပြီတကား။ ၅ လူသတ္တဝါတို့ကိုအမျက်ထွက်၍၊ အစဉ်မပြတ်ရိုက်ခြင်း၊ အတိုင်းတိုင်းအပြည်ပြည်တို့ကိုမာနစိတ်နှင့်အုပ်စိုး၍၊ အစဉ်မပြတ်ညှဉ်းဆဲခြင်းကိုပြုသောအဓမ္မလူတို့၏တောင်ဝှေးကို ၎င်း၊ ၆ ထိုသို့အစိုးရသောသူတို့၏ရာဇလှံတံကို၎င်း၊ ထာဝရဘုရားချိုးတော်မူပြီ။ ၇ မြေတပြင်လုံးသည်ငြိမ်ဝပ်ချမ်း သာခြင်းရှိ၏။ ရွှင်လန်းစွာသီချင်းဆိုသံနှင့်ကြွေးကြော်ကြ၏။ ၈ ထင်းရှူးပင်နှင့်လေဗနုန်အာရဇ်ပင်တို့က၊ သင်သည်လှဲပြီးနောက်၊ ငါတို့ကိုခုတ်လှဲသောသူသည်မတက်မလာရဟုသင့်ကိုရည်ဆောင်၍ဝမ်းမြောက်ကြ၏။ ၉ သင်သည်ရောက်လာသော အခါ၊ အောက်အရပ်၊ မရဏာနိုင်ငံသည်ကြိုဆိုအံ့သောငှါလှုပ်လေ၏။ သင်္ချိုင်းသားများနှင့်လောကီမင်းများအပေါင်းတို့ကိုသင့်အတွက်ကြောင့်နှိုးဆော်လေ၏။ အတိုင်းတိုင်းအပြည်ပြည်သောရှင်ဘုရင်အပေါင်းတို့ကို၊ ရာဇပုလ္လင်တို့မှထစေ၏။ ၁၀ ထိုသူအပေါင်းတို့က၊ သင်သည်လည်းငါတို့ကဲ့သို့အားနည်းပါသည်တကား။ ငါတို့နှင့်တူပါသည်တကား။ ၁၁ သင်၏ဘုန်းသရေ နှင့်သင်၏တူရိယာမျိုးအသံဗလံတို့ကိုမရဏာနိုင်ငံတွင်ရှုတ်ချလေပြီတကား။ သင့်အောက်၌ ပိုးကောင်များကိုခင်းလျက်၊ သင့်အပေါ် ၌ တီကောင်များကိုခြုံလျက်ရှိပါသည်တကား ၊ ဟုသင့်ကိုနှုတ်ဆက်၍ပြောဆိုကြလိမ့်မည်။

၁၂ အိုနံနက်သား၊ မိုးသောက်ကြယ်၊ [A] (a) သင်သည်ကောင်းကင်ကကျလေပြီတကား။ အပြည်ပြည်တို့ကိုနှိပ်စက်သောသင်သည်၊ မြေတိုင်အောင်ခုတ်လှဲခြင်းကိုခံရလေပြီတကား။ ၁၃ သင်ကလည်း၊ ကောင်းကင်ပေါ်သို့ငါတက်မည်။ ဘုရားသခင်၏ကြယ်တို့အပေါ်မှာငါ့ပလ္လင်ကိုငါချီးမြှောက်မည်။ မြောက်မျက်နှာဘက်ဗျာဒိတ်တော်တောင်ပေါ်မှာငါထိုင်မည်။ ၁၄ မိုးတိမ်ထိပ်ပေါ်သို့ငါတက်မည်။ အမြင့်ဆုံးသောဘုရားကဲ့သို့ငါနေမည်ဟုစိတ်အကြံရှိလေပြီ။ ၁၅ သို့သော် လည်း၊ သင်သည်မရဏာနိုင်ငံ၊ သင်္ချိုင်းတွင်းထဲသို့နှိမ့်ချခြင်းကိုခံရလေပြီ။ ၁၆ သင့်ကိုမြင်သောသူတို့သည်စေ့စေ့ကြည့်ရှု၍ ဆင်ခြင်ပြီးလျှင်၊ မြေကြီးကိုတုန်လှုပ်စေ၍၊ တိုင်းနိုင်ငံများကိုလှုပ်ချောက်သောသူတို့ကားဤသူလော။ ၁၇ လောကီနိုင်ငံကိုတောကဲ့သို့ဖြစ်စေ၍၊ မြို့များကိုဖျက်ဆီးသောသူအချုပ်ခံရသောသူတို့ကို မိမိနေရာသို့တဖန်မလွှတ်သောသူကားဤသူလော။ ၁၈ အပြည်ပြည်သောရှင်ဘုရင်အပေါင်းတို့သည်အသီးအသီးမိမိတို့စေတီ၌ ဘုန်းအသေရေနှင့်အိပ်ကြ၏။ ၁၉ သင့်ကိုမူကား၊ ရွံရှာဘွယ်သောသစ်ခက်ကဲ့သို့သင်္ချိုင်းထဲကထုတ်ပစ်ရ၏။ ကွပ်မျက်သောသူ၊ ဓါးဖြင့်ထိုးသောသူ၊ သင်္ချိုင်းအတွင်း၌ ကျောက်စုထဲသို့ချသောသူများနှင့်ဖုံးအုပ်လျက်၊ ​ခြေဖြင့်ကျော်နင်းသောအသေကောင်ဖြစ်လေ၏။ ၂၀ သူတပါးတို့နှင့်ရော နှော၍သင်္ဂြိုလ်ခြင်းကိုမခံရ။ အကြောင်းမူကား၊ မိမိပြည်ကိုဖျက်ဆီးပြီ။ မိမိအမျိုးသားချင်းတို့ကိုသတ်လေပြီ။ အဓမ္မပြုသောသူတို့၏အနွယ်သည်ဂုဏ်အသရေအလျှင်းမရှိရဟုပြောဆိုကြလိမ့်မည်။ ၂၁ သူ၏သားမြေးတို့သည်မထ၊ မြေကြီးကိုမပိုင်၊ မြေတပြင်လုံးတွင်ရန်သူများကိုမနှိုးဆော်နိုင်မည်အကြောင်း၊ သူတို့အဘို့ ဘိုးဘေးတို့၏အပြစ်ကြောင့်ကွပ်မျက်ခြင်းကိုပြင်ကြလော့။ ၂၂ ကောင်းကင်ဗိုလ်​ခြေအရှင်ထာဝရဘုရားမိန့်တော်မူသည်ကား။ ငါသည်သူတို့တဘက်၌ ထ၍ဗာဗုလုန်မြို့၏နာမနှင့်အကြွင်း အကျန်ကို၎င်း၊ သားမြေးတို့ကို၎င်း၊ ပယ်ဖြတ်မည်ဟုထာဝရဘုရားမိန့်တော်မူ၏။ ၂၃ တဖန်လည်း၊ ငါသည်ထိုမြို့ကိုဖြူ ကောင်များနေရာ၊ ရေလွှမ်းမိုးရာအရပ်ဖြစ်စေမည်။ ဖျက်ဆီးခြင်း၏တံမြက်စည်းဖြင့်လှည်းမည်၊ ဟုကောင်းကင်ဗိုလ်​ခြေအရှင်ထာဝရဘုရားမိန့်တော်မူ၏။

၂၄ ကောင်းကင်ဗိုလ်​ခြေအရှင်ထာဝရဘုရားသည်ကြိမ်ဆို၍မိန့်တော်မူသည်ကား၊ ၂၅ ငါ၏မြေပေါ်မှာအာရှုရိမင်းကို ငါနှိပ်စက်မည်။ ငါ၏တောင်ရိုးပေါ်မှာခြေဖြင့်ကျော်နင်းမည်ဟုငါကြံစည်သည်အတိုင်းဖြစ်၍၊ ငါ့စီရင်ချက်လည်းတည်ရလိမ့်မည်။ ထိုအခါသူ၏ထမ်းပိုးကိုသူတပါးအပေါ်ကရွှေ့၍၊ သူတို့ပုခုံးပေါ်မှာတင်သောဝန်ကိုချရသောအခွင့်ရှိလိမ့်မည်။ ၂၆ မြေတပြင်လုံးတွင်ထိုသို့ကြံစည်တော်မူ၏။ ခပ်သိမ်းသောပြည်တို့အပေါ်မှာထိုသို့လက်တော်ကိုဆန့်လျက်ရှိ၏။ ၂၇ ကောင်းကင်ဗိုလ်​ခြေအရှင်ထာဝရဘုရား၏အကြံတော်ကိုအဘယ်သူဖျက်လိမ့်မည်နည်း။ ဆန့်တော်မူသောလက်တော်ကိုအဘယ်သူလှန်လိမ့်မည်နည်း။

၂၈ အာခတ်မင်းကြီးအနိစ္စရောက်သောနှစ်တွင်ခံရသောဗျာဒိတ်တော်ဟူမူကား၊ ၂၉ အိုဖိလိတ္တိပြည်လုံး၊ သင့်ကိုရိုက်သောကြိမ်လုံးကျိုးသည်ကိုထောက်၍၊ ဝမ်းမမြောက်နှင့်။ ထိုမြွေအမျိုးထဲကမြွေဆိုးပေါက်လိမ့်မည်။ သူ၏အနွယ်သည်လည်းပျံတတ်သောမီးမြွေဖြစ်လိမ့်မည်။ ၃၀ အတိုင်းထက်အလွန်ဆင်းရဲသောသူတို့သည်စားရကြလိမ့်မည်။ ဆင်းရဲငြိုငြင်သောသူတို့သည်ဘေးလွတ်လျက်အိပ်ရကြလိမ့်မည်။ ငါသည်သင်၏အမြစ်ကိုသွေ့​ခြောက်ခြင်းအားဖြင့်သတ်၍၊ သင်၏အကြွင်းကိုလည်း မြွေဆိုးသည်ကွပ်မျက်လိမ့်မည်။ ၃၁ အိုတံခါး၊ ညည်းတွားလော့။ အိုမြို့၊ ငိုကြွေးမြည်တမ်းလော့။ အိုဖိလိတ္တိပြည်လုံး၊ သင်သည်မှိုင်တွေလျက်ရှိ၏။ မြောက်မျက်နှာမှမီးခိုးထွက်လာ၏။ ထိုအလုံးအရင်း၌ တယောက်တခြားစီနေသောသူမရှိ။ ၃၂ တပြည်တနိုင်ငံမှရောက်လာသောသံတမန်တို့အား၊ အဘယ်သို့ပြန်ပြောရမည်နည်းဟူမူကား၊ ထာဝရဘုရားသည်ဇိအုန်မြို့ကိုတည် ထောင်မူတော်သည်ဖြစ်၍၊ ကိုယ်တော်၏ဆင်းရဲသားတို့သည်ထိုမြို့၌ ကိုးစားကြ၏။

၁၂ (a) မိုးသောက်ကြယ်ဟုအခြားကျမ်းစာအုပ်များ၌ ရေးသောအရာကို၊ အင်္ဂလိပ်ကျမ်းစာအုပ် King James Version ၌ လူစီဖါ Lucifer ဟုရေးထားသည်။ Lucifer ၏အဓိပ္ပါယ်သည်မိုးသောက်ကြယ်ဖြစ်သည်။