ဆာလံကျမ်း

အခန်းကြီး ၈၈

အကျွန်ုပ် အောဟစ်သံ နားထောင်တော်မူပါ

CROSS REFERENCES

ဆာ ၃၂း၆

ဆာ ၃၂း၆
၆ ထို့ကြောင့် ကိုယ်တော်ကို တွေ့သင့်သော အချိန်ကာလ၌ သန့်ရှင်းသူအပေါင်းတို့သည် ရှေ့တော်၌ တောင်းလျှောက်ကြပါ လိမ့်မည်။ အကယ်စင်စစ် လွှမ်းမိုးတတ်သော ရေကြီးသည် သူတို့ထံသို့ မချဉ်းရပါ။

ဆာ ၄၂းရ
၇ ရေဘွေတော်များအသံ ဗလံနှင့်တကွ ဝဲဩဃတခုကို တခုဟစ်ခေါ်၍ လှိုင်းတံပိုးတော် အပေါင်းတို့သည် အကျွန်ုပ်ကို လွှမ်းမိုးကြပါပြီ။

ဆာ ၆၉း၁
၁ အကျွန်ုပ်ကို ကယ်ယူတော်မူပါ ဘုရား။ ရေသည် အကျွန်ုပ် အသက်ဝိညာဉ် တိုင်အောင်ရောက်ပါပြီ။

ဆာ ၈၈း၆-ရ
၆ အကျွန်ုပ်ကို အနက်ဆုံးသောတွင်း၊ မှောင်မိုက်ဖုံးလွှမ်း၍ အလွန်နက်နဲသော အရပ်၌ ချထားတော်မူပြီ။

ဆာ ၁၂၄း၄
၄ ထိုအခါ ငါတို့ကို ရေသည်လွှမ်းမိုး၍ စီးသောရေသည် ငါတို့ဝိညာဉ်အပေါ်မှာ ကျော်သွားပြီတကား။

ယောန ၂း၅
၅ ရေတို့သည် အကျွန်ုပ်အသက်ကို သေစေခြင်းငှါ ဝိုင်းသဖြင့်၊အကျွန်ုပ်သည် ပင်လယ်အလယ်၌ အချုပ်ခံရပါ၏။ ပင်လယ်မြက်ပင်သည် အကျွန်ုပ်ခေါင်းကို ပေါင်းစည်းလျက်ရှိပါ၏။

၁ အကျွန်ုပ်ကို ကယ်တင်တော်မူသော ဘုရားသခင် ထာဝရဘုရား၊ အကျွန်ုပ်သည် ရှေ့တော်၌ နေ့ညမပြတ် အော်ဟစ်ပါ၏။ ၂ အကျွန်ုပ်ပြုသော ပဌနာသည် အထံတော်သို့ ဝင်ပါစေသော်။ အော်ဟစ်သံကို နားထောင်တော်မူပါ။ ၃ အကျွန်ုပ်၏ ဝိညာဉ်သည် ဒုက္ခနှင့်ပြည့်၍၊ အသက်သည်လည်း မရဏာ နိုင်ငံအနီးသို့ ရောက်ပါပြီ။ ၄ အကျွန်ုပ်သည် သင်္ချိုင်းတွင်းထဲသို့ ဆင်းသောသူတို့နှင့်တကွ ရေတွက်ဝင်ခြင်းသို့ ရောက်ပါ၏။ အားကုန်သောသူ ကဲ့သို့ဖြစ်ပါ၏။ ၅ အသေကောင်တို့တွင် ပစ်ထားသောသူ၊ ကွပ်မျက်၍ သင်္ချိုင်းတွင်း၌ အိပ်နေသောသူ တည်းဟူသော အောက်မေ့တော်မမူ၊ လက်တော်၏ မစခြင်းနှင့် ကွာဝေးသောသူ ကဲ့သို့ဖြစ်ပါ၏။ ၆ အကျွန်ုပ်ကို အနက်ဆုံးသောတွင်း၊ မှောင်မိုက်ဖုံးလွှမ်း၍ အလွန်နက်နဲသော အရပ်၌ ချထားတော်မူပြီ။ [A] ၇ အမျက်တော်သည်၊ အကျွန်ုပ်အပေါ်၌ ဖိလျက်ရှိပါ၏။ လှိုင်းတံပိုးတော် အပေါင်းတို့နှင့် နှိပ်စက်တော်မူ၏။ ၈ အကျွန်ုပ်၏ အသိအကျွမ်းများကို အဝေးသို့ ရွေ့တော်မူပြီ။ သူတို့အား အကျွန်ုပ်ကို ရွံ့ရှာဘွယ် ဖြစ်စေတော်မူပြီ။ အကျွန်ုပ်သည် အချုပ်ခံရ၍၊ ပြင်သို့ မထွက်ရပါ။ ၉ အကျွန်ုပ်ခံရသော ဒုက္ခကြောင့် အကျွန်ုပ်မျက်စိသည် ပျက်ပါ၏။ အိုထာဝရဘုရား၊ ကိုယ်တော်ကို အစဉ် အော်ဟစ်ပါ၏။ အထံတော်သို့ လက်ကိုဆန့်ပါ၏။

သင်္ချိုင်းသားတို့သည် ချီးမွမ်းကြပါမည်လော

CROSS REFERENCES

ဟေရှာယ ၃၈း၁၈
၁၈ အကယ်စင်စစ် မရဏာနိုင်ငံသည် ဂုဏ်တော်ကို မချီးမွမ်းရပါ။ သေနေသောသူသည် ဂုဏ်တော်ကို ထောမနာသီချင်း မဆိုရပါ။ တွင်းထဲသို့ ဆင်းသောသူသည် သစ္စာတော်ကို မမြော်လင့်ရပါ။

ဆာ ၆း၆
၆ အကျွန်ုပ်သည် ညည်းတွား၍ ပင်ပန်းလှပါ၏။ အကျွန်ုပ်ခုတင်ကို ကိုယ်မျက်ရည်၌ တညလုံးမျှော၍ အိပ်ရာကိုလည်း မွန်းစေပါ၏။

ဆာ ၃၀း၉
၉ သင်္ချိုင်းတွင်းထဲသို့ ဆင်းလျှင် အဘယ်အကျိုး ရှိပါအံ့နည်း။

ဆာ ၈၈း၁၁
၁၁ ကရုဏာတော်ကို သင်္ချိုင်းတွင်း၌၎င်း၊သစ္စာတော်ကို ပျက်စီးရာအရပ်၌၎င်း၊ ကြားပြောရကြပါမည်လော။

ဒေသနာ ၉း၁၀
၁၀ ဆောင်ရွက်စရာ အမှုရှိသမျှကို ကြိုးစား အားထုတ်၍ ဆောင်ရွက်လော့။ အကြောင်းမူကား၊ သင်ယခုသွား၍ ရောက်ရလတံ့သော အရပ်တည်းဟူသော မရဏာနိုင်ငံ၌ လုပ်ဆောင်ခြင်းမရှိ။ ကြံစည်ခြင်းမရှိ။ သိပ္ပံအတတ်မရှိ။ ပညာမရှိပါတကား။

၁၀ သေလျက်နေသောသူတို့အား အံ့ဘွယ်သောအမှုတို့ကို ပြတော်မူမည်လော။ သင်္ချိုင်းသားတို့သည်ထ၍ ကိုယ်တော်ကို ချီးမွမ်း ကြပါမည်လော။ ၁၁ ကရုဏာတော်ကို သင်္ချိုင်းတွင်း၌၎င်း၊ [B]သစ္စာတော်ကို ပျက်စီးရာအရပ်၌၎င်း၊ ကြားပြောရကြပါမည်လော။ ၁၂ အံ့ဘွယ်သောအမှုတို့ကို မှောင်မိုက်သော အရပ်၌၎င်း၊ ဖြောင့်မတ်တော်မူခြင်း တရားကို မေ့လျော့ရာပြည်၌၎င်း၊ သိရကြပါမည်လော။ ၁၃ အိုထာဝရဘုရား၊ ကိုယ်တော်ကို အကျွန်ုပ် အော်ဟစ်ပါ၏။ နံနက်အချိန်၌ အကျွန်ုပ်၏ ပဌနာသည် ရှေ့တော်သို့ ရောက်ပါ၏။ ၁၄ အိုထာဝရဘုရား၊ အကျွန်ုပ်၏ ဝိညာဉ်ကို အဘယ်ကြောင့် ပယ်တော်မူသနည်း။ မျက်နှာတော်ကို အကျွန်ုပ်မှ အဘယ်ကြောင့် လွှဲတော်မူသနည်း။ ၁၅ အကျွန်ုပ်သည် ဒုက္ခဝေဒနာကိုခံရ၍ သေဆဲရှိပါ၏။ စီရင်တော်မူသော ဘေးများကို ငယ်သော အရွယ်ကပင်ခံရ၍ ပင်ပန်းပါ၏။ ၁၆ အမျက်တော်သည် အကျွန်ုပ်ကို လွှမ်းမိုးပါ၏။ စီရင်တော်မူသော ဘေးတို့သည် အကျွန်ုပ်၏ အသက်ကို ညှဉ်းဆဲသည့်တိုင်အောင်၊ ၁၇ ရေကဲ့သို့ အစဉ်အပြတ်ဝိုင်း၍ တညီတညွတ်တည်း ဝန်းရံကြပါ၏။ ၁၈ ချစ်သောသူနှင့် အဆွေခင်ပွန်းကို အကျွန်ုပ်နှင့် ဝေးဝေးရွေ့တော်မူပြီ။ အသိအကျွမ်းတို့သည် မှောင်မိုက်ထဲမှာ ရှိကြပါ၏။