ဆာလံကျမ်း
အခန်းကြီး ၃၅
ထာ၀ရဘုရားထံ အကူအညီတောင်း
၁ အိုထာဝရဘုရား၊ အကျွန်ုပ်၌ ဆန့်ကျင်ဘက် ပြုသောသူတို့ကို ဆန့်ကျင်ဘက် ပြုတော်မူပါ။ အကျွန်ုပ်ကို စစ်တိုက်သော သူတို့ကို တိုက်တော်မူပါ။ ၂ ဒိုင်းလွှားကိုကိုင်၍ အကျွန်ုပ်ကို ကူညီစေခြင်းငှါ ထတော်မူပါ။ ၃ အကျွန်ုပ်ကို လိုက်သောသူတို့ ရှေ့၌ လှံတော်ကိုရွယ်၍ ဆီးတားတော်မူပါ။ ငါသည် သင်၌ ချမ်းသာပေးသောသူ ပေတည်း၊ ဟုအကျွန်ုပ်၏ ဝိညာဉ်အား မိန့်တော်မူပါ။ ၄ အကျွန်ုပ် အသက်ကို ရှာသောသူတို့သည် အရှက်ကွဲ၍ မျက်နှာပျက် ကြပါစေသော်။ အကျွန်ုပ်ကို အန္တရာယ်ပြုမည်၊ ဟုကြံစည်သောသူတို့သည် လှန်ခြင်းကိုခံရ၍ ရှက်ကြောက်ခြင်းသို့ ရောက်ကြပါစေသော်။ ၅ ထိုသူတို့သည် လေတိုက်သော ဖွဲကဲ့သို့ ဖြစ်ကြပါစေသော်။ ထာဝရဘုရား၏ တမန်သည်လည်း သူတို့ကို လှဲပါစေသော်။ ၆ သူတို့သွားသောလမ်းသည် မိုက်သောလမ်း၊ ချောသောလမ်း ဖြစ်ပါစေသော်။ ထာဝရဘုရား၏ တမန်သည်လည်း သူတို့ကို လိုက်ပါစေသော်။ ၇ အကြောင်းမရှိဘဲ အကျွန်ုပ်အဘို့ ကျော့ကွင်းကို ဝှက်ထားကြပါပြီ။ အကြောင်းမရှိဘဲ အကျွန်ုပ် အသက်ကို သတ်စရာဘို့ တွင်းကိုတူးကြပါပြီ။ ၈ ထိုသို့သောသူသည် အမှတ်တမဲ့ ပျက်စီးခြင်းသို့ ရောက်ပါစေသော်။ မိမိဝှက်ထားသော ကျော့ကွင်းသည် မိမိကို ကျော့မိပါစေသော်။ မိမိတွင်းထဲသို့ မိမိကျပါစေသော်။
ထာဝရဘုရား၌ ဝမ်းမြောက်မည်
၉ သို့ဖြစ်လျှင်၊ ငါ၏ဝိညာဉ်သည် ထာဝရဘုရားကို အမှီပြု၍ ဝမ်းမြောက်ခြင်း ရှိလိမ့်မည်။ ကယ်တင် တော်မူခြင်း အကြောင်းကိုလည်း အမှီပြု၍ စိတ်ရွှင်လန်း မြူးတူးခြင်း ရှိလိမ့်မည်။ ၁၀ အကျွန်ုပ် အရိုးရှိသမျှတို့လည်း၊ အိုထာဝရဘုရား၊ အစိုးတရ ပြုသောသူ၏ လက်မှ ဆင်းရဲသားကို နှုတ်တော်မူ၍၊ လုယူ ဖျက်ဆီးတတ်သော သူ၏လက်၌ ဆင်းရဲ ငတ်မွတ်လျက် ခံနေရသောသူကို ချမ်းသာ ပေးတော်မူတတ်သော ကိုယ်တော်နှင့် အဘယ်သူ တူပါသနည်း၊ ဟုလျှောက်ဆိုကြမည်။
ငါမူကား သူတို့အပေါ် ဆုတောင်းပေး
၁၁ မမှန်သော သက်သေတို့သည် ပေါ်လာ၍၊ ငါမသိသော မှုပြစ်တို့ကို ငါ့အပေါ်မှာတင်ကြ၏။ ၁၂ ငါပြုသော ကျေးဇူးအတွက် သူတို့သည် ငါ့အသက်ကို လုယူခြင်း တည်းဟူသော မကောင်းသော အရာကို ဆပ်ပေးကြ၏။ ၁၃ ငါမူကား၊ သူတို့၌ အနာရောဂါ စွဲသောအခါ၊ လျှော်တေအဝတ်ကို ဝတ်ဆင်လျက် အစာကိုရှောင်၍ ခြိုးခြံစွာ ကျင့်လေ၏။ ကိုယ်ရင်ခွင်ကို မျက်နှာပြုလျက် ဆုတောင်းလေ၏။ ၁၄ သူတို့ကို ငါ၏မိတ်ဆွေ၊ ငါ၏ညီအစ်ကို ကဲ့သို့ သဘောထား၍ ငါပြု၏။ ကိုယ်အမိကို အောက်မေ့၍၊ စိတ်မသာ ညည်းတွားသော သူကဲ့သို့ ကြမ်းတမ်းသော အဝတ်ကို ဝတ်လျက် တမှိုင်မှိုင်နေလေ၏။
ငါလဲသောအခါ ဝမ်းမြောက်ကြ
၁၅ ငါလဲသောအခါမှုကား သူတို့သည် ဝမ်းမြောက်၍ စည်းဝေးကြ၏။ ရိုက်ပုတ်သောသူတို့သည် ငါ့တဘက်၌ စည်းဝေးကြ၏။ သူတို့ကိုလည်း ငါမသိရ။ မရပ်မနေဘဲ ငါ့ကို ဆွဲဖြတ်ကြ၏၊ ၁၆ ပွဲ၌ ခစားတတ်သော လူဆိုးတို့နှင့်အတူ ငါကို အံသွားခဲကြိတ်ကြ၏။ ၁၇ အိုထာဝရဘုရား အဘယ်မျှ ကာလပတ်လုံး ကြည့်ရှု၍ နေတော်မူမည်နည်း။ အကျွန်ုပ်အသက်ကို သူတို့ပြုသော ဘေးဥပဒ်မှ၎င်း၊ အကျွန်ုပ် အချစ်ဆုံးကို ခြင်္သေ့တို့မှ၎င်း၊ ကယ်လွှတ်တော်မူပါ။ ၁၈ ကျေးဇူးတော် ကြီးလှပါ၏၊ ဟုမဟာပရိသတ် အလယ်မှာ အကျွန်ုပ်ဝန်ခံပါမည်။ များစွာသော လူစုတွင် ကိုယ်တော်ကို ချီးမွမ်းပါမည်။ ၁၉ မဟုတ်မမှန်ဘဲ အကျွန်ုပ်ကို ရန်ဘက်ပြုသော သူတို့သည် အောင်ပွဲကို မခံကြပါစေနှင့်။ အကြောင်းမရှိဘဲ အကျွန်ုပ်ကို မုန်းသောသူတို့လည်း မျက်စိစွေပြခြင်းကို မပြုကြပါစေနှင့်။ ၂၀ အကြောင်းမူကား သူတို့သည် အမှုငြိမ်းစေသော စကားကိုမပြောကြပါ။ ငြိမ်ဝပ်စွာနေသော ပြည်သားတို့ တဘက်၌ လျှို့ဝှက်သော အမှုများကို ကြံစည်ကြပါ၏။ ၂၁ အကျွန်ုပ်ကို ပါးစပ်ဟ၍ အေ့ဟေ၊ အေ့ဟေ၊ ငါတို့သည် ကိုယ်မျက်စိနှင့် မြင်ရပြီ၊ ဟုဆိုကြပါ၏။
ဘုရားထံအကူအညီတောင်း
၂၂ အိုထာဝရဘုရား ကိုယ်တော်သည် သိမြင်တော်မူ၏။ အိုဘုရားရှင် တိတ်ဆိတ်စွာ နေတော်မမူပါနှင့်။ အကျွန်ုပ်နှင့် ဝေးဝေး နေတော်မမူပါနှင့်။ ၂၃ အကျွန်ုပ်၏ ဘုရားသခင် အကျွန်ုပ်၏အရှင်၊ အကျွန်ုပ်၌ ရောက်သော အမှုကို စီရင်တော်မူမည်အကြောင်း ကိုယ်ကို နှိုးဆော်၍ ထတော်မူပါ။ ၂၄ အကျွန်ုပ်၏ ဘုရားသခင် ထာဝရဘုရား၊ ကိုယ်တော်သည် ဖြောင့်မတ် တော်မူခြင်းနှင့်အညီ၊ အကျွန်ုပ်အမှုကို ဆုံးဖြတ်တော်မူပါ။ သူတို့သည်အကျွန်ုပ်ကိုနိုင်၍ ဝမ်းမမြောက် ကြပါစေနှင့်။ ၂၅ အဲ၊ ငါတို့အလိုပြည့်စုံပြီ၊ ဟုမအောက်မေ့ကြပါစေနှင့်။ ငါတို့သည် သူ့ကိုမျိုပြီ၊ ဟုမပြောကြပါစေနှင့်။ ၂၆ အကျွန်ုပ်၌ ဘေးရောက်သည် အကြောင်းကို ဝမ်းမြောက်သောသူ အပေါင်းတို့သည် အရှက်ကွဲ၍ မျက်နှာပျက်ကြပါစေသော်။ အကျွန်ုပ်တဘက်၌ ကိုယ်ကိုချီး မြှောက်တတ်သော သူတို့အပေါ်မှာ အသရေပျက်ခြင်းနှင့် ရှက်ကြောက်ခြင်း သက်ရောက်ပါစေသော်။ ၂၇ အကျွန်ုပ်၏ ဟုတ်မှန်ခြင်းဘက်၌ နေသောသူတို့သည် ရွှင်လန်းစွာ သီချင်းဆို၍ ဝမ်းမြောက်ကြပါစေသော်။ မိမိကျွန်၌ ချမ်းသာ တိုးပွားခြင်းအကြောင်းကို နှစ်သက်တော်မူသော ထာဝရဘုရားသည် ဘုန်းကြီး တော်မူစေသတည်း၊ ဟုသူတို့သည် အစဉ်မပြတ် မြွက်ဆိုကြပါစေသော်။ ၂၈ အကျွန်ုပ်သည်လည်း ကိုယ်တော်၏ ဖြောင့်မတ် တော်မူခြင်း အကြောင်းအရာကို မြွက်ဆို၍၊ အစဉ်မပြတ် ကိုယ်တော်ကို ချီးမွမ်းပါမည်။