ဆာလံကျမ်း
အခန်းကြီး ၁၁
မတရားသောသူလေးကိုတင်
၁ မတရားသောသူတို့သည် သဘောဖြောင့်သောသူတို့ကို၊ မထင်မရှား ပစ်အံ့သောငှါ လေးကိုတင်၍၊ လေးညှို့ပေါ်မှာ မြှားကို ပြင်ကြ၏။၂ အမှီတကဲတို့သည်ပျက်လျှင် ဖြောင့်မတ်သောသူသည် အဘယ်သို့ ပြုနိုင်သနည်း။ ၃ ငါ့ဝိညာဉ်အား သင်သည် ငှက်ကဲ့သို့၊ ကိုယ်နေရာ တောင်ပေါ်သို့ ပြေးချေ၊ ဟုအဘယ်ကြောင့် ပြောကြသနည်း။ ထာဝရဘုရားသည် ငါခိုလှုံရာ ဖြစ်တော်မူ၏။
ထာ၀ရဘုရားသည် ဗိမာန်တော်မှ ကြည့်ရှု
၄ ထာဝရဘုရားသည်၊ သန့်ရှင်းသော ဗိမာန်တော်၌ ရှိတော်မူ၏။ ထာဝရဘုရား၏ ပလ္လင်တော်သည်၊ ကောင်းကင်ပေါ်မှာ တည်၏။ မျက်စိတော်သည် ကြည့်ရှု၍၊ မျက်ခမ်းတော်သည် လူသားတို့ကို စစ်တော်မူ၏။ ၅ ထာဝရဘုရားသည် ဖြောင့်မတ်သောသူကို၊ စုံစမ်းတော်မူ၏။ မတရားသောသူနှင့် လုယူ ဖျက်ဆီးလိုသောသူကို၊ ဝိညာဉ်တော်သည် မုန်းတော်မူ၏။ ၆ မတရားသောသူ တို့အပေါ်မှာ၊ တောက်သောမီးခဲကန့်နှင့် ရောသောမီးလျှံ၊ ပူလောင်သော မုန်တိုင်းကို သက်ရောက်စေ၍၊ သူတို့သောက်စရာဘို့ စီရင်တော်မူမည်။ ၇ တရားသဖြင့် ပြုတော်မူသော ထာဝရဘုရားသည်၊ တရားသောအမှုကို နှစ်သက်၍ သဘော ဖြောင့်သောသူကို မျက်နှာပြုတော်မူ၏။
