ယေဇကျေလ အနာဂတ္တိ

အခန်းကြီး ၂၇

၁ တဖန်ထာဝရဘုရား၏ နှုတ်ကပတ်တော်သည် ငါ့ဆီသို့ရောက်လာ၍၊ ၂ အချင်းလူသား၊ တုရုမြို့အတွက်မြည်တမ်းခြင်းကိုပြု၍၊ တုရုမြို့အား ဆင့်ဆိုရမည်မှာ၊ ၃ အိုပင်လယ်ဝ၌ တည်သောမြို့၊ များစွာသောကျွန်းသူ​ကျွန်းသားတို့အဘို့ ကုန်သွယ်တက်သောမြို့၊ သင့်ကိုအရှင်ထာဝရဘုရား မိန့်တော်မူသည်ကား၊ အိုတုရုမြို့၊ သင်က၊ ငါ၏တင့်တယ်ခြင်းစုံလင်ပြီ၊ ဟုဆိုတတ်၏။ ၄ သင်၏နံပါးတို့သည် ပင်လယ်ထဲမှာရှိ၏။ သင်၏ဗိသုကာတို့သည် သင့်ကိုစုံလင်စွာ တင့်တယ်စေခြင်းငှါ ပြုကြပြီ။ ၅ သင်၏ပျဉ်ပြားရှိသမျှတို့ကို စေနိရ Senir (a) ထင်းရှုးသစ်သားဖြင့်လုပ်၍၊ ရွက်တိုင်ဘို့ လေဗနုန်အားအာရဇ်ပင်တို့ကို ယူကြပြီ။ ၆ ဗာရှန်သပိတ်သစ်သားဖြင့် တက်တို့ကို၎င်း၊ ခိတ္တိမ်​ကျွန်းတို့မှယူခဲ့၍ ဆင်စွယ်နှင့်စီချယ်သောတာရှုရသစ်သားဖြင့် ကန့်တို့ကို၎င်းလုပ်ကြပြီ။ ၇ အဲဂုတ္တိပြည်၌ ချယ်လှယ်သောပိတ်ချောရွက်တို့ကိုဖြန့်၍၊ ဧလိရှ​Elishah ကျွန်းတို့မှယူခဲ့သောအထည်ပြာ၊ အထည်မောင်းဖြင့်လုပ်သောမျက်နှာကျက်နှင့်ပြည့်စုံ၏။ ၈ ဇိအုန်မြို့သား၊ အာဝဒ်မြို့သားတို့သည်သင်္ဘောသားဖြစ်၍၊ တုရုပညာရှိတို့သည်လမ်းပြမာလိန်ဖြစ်ကြ၏။ ၉ ဂေဗလလူကြီးပညာရှိတို့သည်သင့်ကိုပြုပြင်လျက်လိုက်ကြ၏။ ပင်လယ်ကူးတက်သောသင်္ဘောရှိသမျှ၊ သင်္ဘောသားတို့နှင့်တကွသင်နှင့်ဖောက်ကားရောင်းဝယ်ခြင်ငှါပါကြ၏။ ၁၀ ပေရသိလူ၊ လုဒလူ၊ ဖုတလူတို့သည်သင်၏တပ်သားစစ်သူရဲလုပ်ကြ၏။ ဒိုင်း၊ လွှား၊ သံခမောက်လုံးတို့ကိုပြင်ဆင်၍၊ သင်၏ဂုဏ်အသေရေကို ထင်ရှားစေကြ၏။ ၁၁ အာဝဒ်အမျိုးသားတို့သည်သင်၏တပ်သားတို့နှင့်တကွမြို့ရိုးပတ်လည်စီးကြ၏။ ဂမ္မဒိမ်လူတို့သည် ပြအိုးတို့ကိုစောင့်၍၊ မြို့ရိုးပတ်လည်၌ မြှားတောင့်တို့ကိုပြင်ဆင်သဖြင့်၊ သင်၏တင့်တယ်ခြင်းကိုစုံလင်စေကြ၏။ ၁၂ သင့်၌ ကုန်သွယ်ရန်ဥစ္စာများသောကြောင့်၊ တာရှုမြို့သည်ငွေ၊ သံ၊ သံဖြူ၊ ခဲတို့ကိုသင့်ဝိုင်းသို့ယူခဲ့၍သင်နှင့်ကုန်သွယ်ခြင်းကိုပြုလေ၏။ ၁၃ ယာပန်မြို့၊ တုဗလမြို့၊ မေရှက်မြို့တို့သည်သင်နှင့်ကုန်သွယ်၍၊ လူ​ကျွန်တို့နှင့်​ကြေးနီဖလားတို့ကိုသင့်စျေး၌ ရောင်းကြ၏။ ၁၄ တောဂါမအမျိုးသားတို့သည်မြင်း၊ မြင်းစီးသူ၊ လားတို့ကိုသင့်ဝိုင်း၌ သွင်းကြ၏။ ၁၅ ဒေဒန်မြို့သားတို့သည်လည်းသင်နှင့်ကုန်သွယ်ကြ၏။ များစွာသောတ​ကျွန်းတနိုင်ငံအရပ်သားတို့သည်သင်လုပ်သောဥစ္စာကိုဝယ်၍ဦးချို၊ ဆင်စွယ်၊ သစ်သားနက်ကိုပြန်ပေးကြ၏။ ၁၆ သင်လုပ်သောဥစ္စာများသောကြောင့်ရှုရိပြည်သည်သင်နှင့်ကုန်သွယ်၍၊ နပတ်ကျောက်၊ ပြာသောအထည်၊ ချယ်လှယ်သောအဝတ်၊ ပိတ်ချော၊ သန္တာကျောက်နီတို့ကိုသင့်ဝိုင်း၌ သွင်းကြ၏။ ၁၇ ယုဒပြည်နှင့်ဣသရေလပြည်သည်သင်နှင့်ကုန်သွယ်၍၊ ဂျုံစပါး၊ မုရန်စေး၊ ပနက်စေး၊ ဗာလံစေး၊ ဆီ၊ ပျားရည်တို့ကိုသင့်စျေး၌ သွင်းကြ၏။ ၁၈ ဒမာသက်မြို့သည် သင်လုပ်သော ဥစ္စာများ စည်းစိမ်များ ပြား သောကြောင့်၊ ဟေဗလုန်စပျစ်ရည် ဖြူသောသိုးမွှေးကိုဖယ်လျက်ဖောက်ကားတတ်၏။ ၁၉ ဝေဒန်မြို့မှာယာဝန်ပြည်ဥဇာလမြို့သည်လည်းပြောင်ကိုသင့်ဝိုင်းသို့ ယူခဲ့၍၊ သင့်စျေး၌ သစ်ကြမ်းပိုးနှင့်ကြံလည်းရှိ၏။ ၂၀ ဒေဒန်မြို့သည်မြင်းစီးသူရဲသုံးစရာချောသောအထည်မျိုးကိုရောင်း၍ သင်နှင့်ကုန်သွယ်၏။ ၂၁ အာရပ်ပြည်နှင့်ကေဒါမင်းအပေါင်းတို့သည်သင်လုပ်သောဥစ္စာကိုရခြင်းငှါသိုးသငယ်၊ သိုးထီး၊ ဆိတ်များတို့နှင့်ဖယ်လှယ်၍ကုန်သွယ်ကြ၏။ ၂၂ ရှေဘကုန်သည်၊ ရာဂမကုန်သည်တို့သည်သင်နှင့်ကုန်သွယ်၍အမြတ်ဆုံးသောနံ့သာမျိုး၊ အဘိုးကြီးသောကျောက်မျိုး၊ ရွှေမျိုးကိုသင့်ဝိုင်း၌ သွင်းကြ၏။ ၂၃ ခါရန်မြို့သား၊ က‌န္နေမြို့သား၊ ဧဒင်မြို့သား၊ ရှေဘကုန်သည်အာရှုရိကုန်သည်ခိလမဒ်ကုန်သည်တို့သည်လည်း၊ သင်နှင့်ကုန်သွယ်၍၊ ၂၄ ထူးဆန်းသောဥစ္စာ၊ ပြာသောအထည်၊ ချယ်လှယ်သောအထည်အဘိုးထိုက်သောအဝတ်တန်ဆာပါ၍၊ ကြိုးနှင့်ပတ်ရစ်ရသောအာရဇ်သေတ္တာတို့ကို သင်၏ကုန်ထဲသို့သွင်းကြ၏။ ၂၅ တာရှုသင်္ဘောတို့သည်သင်၏ကုန်ကိုဆောင်လျက်သွားသဖြင့်သင်သည်ပင်လယ် အလယ်၌ ကြွယ်ဝ၍အလွန်ဘုန်းကြီးလေ၏။

၂၆ ယခုမူကား၊ သင်၏တက်ခတ်သားတို့သည်သင့်ကိုကြီးစွာသောရေထဲသို့ဆောင်သွား၍၊ အရှေ့လေကို၎င်းပင်လယ်အလယ်၌ ချိုးလေပြီ။ ၂၇ သင်သည်လဲပျက်သောအခါသင်၏ ဥစ္စာ၊ ဝိုင်း၊ ကုန်၊ သင်္ဘောသား၊ လမ်းပြမာလိန်၊ ပြုပြင်သူ၊ ကုန်သည်၊ စစ်သူရဲအလုံးအရင်းပါသမျှတို့သည်ပင်လယ်အလယ်၌ ကျရကြလိမ့်မည်။ ၂၈ သင်သည်လမ်းပြမာလိန်တို့ အော်ဟစ်သံကြောင့်ပတ်ဝန်းကျင်အရပ်တို့သည်လှုပ်ရှားကြလိမ့်မည်။ ၂၉ တက်ခတ်သောသူအပေါင်းတို့သည်သင်္ဘောမှဆင်း၍သင်္ဘောသားများပင်လယ်လမ်းပြမာလိန်အပေါင်းတို့သည်ကုန်းပေါ်မှာရပ်လျက်၊ ၃၀ သင့်အဘို့အော်ဟစ်၍ပြင်းစွာ ငိုကြွေးကြလိမ့်မည်။ မြေမှုန့်ကိုမိမိကိုခေါင်းပေါ်မှာပစ်တင်၍ပြာ၌ လူးကြလိမ့်မည်။ ၃၁ ဆံပင်ကိုလည်းဖြတ်၍လျှော်တေအဝတ်ကိုဝတ်စည်းလျက်ညှိုးငယ်သောစိတ်နှင့်သင့်အဘို့ပြင်းစွာငိုကြွေးမြည်တမ်းရသည်ကား၊ ၃၂ ပင်လယ်အလယ်၌ ဆုံးသောမြို့တည်းဟူသောတုရုမြို့နှင့်အဘယ်မြို့တူသနည်း။ ၃၃ သင်၏ဥစ္စာတို့သည်ပင်လယ်ကမ်းဖြင့်ထွက်သွားသောအခါ၊ လူမျိုးများတို့သည်ရောင်ရဲစေ၍များပြားသောဥစ္စာကုန်စလယ်တို့ဖြင့်၊ လောကီရှင်ဘုရင်တို့ကိုကြွယ်ဝစေတတ်၏။ ၃၄ ယခုမူကား၊ သင်သည်ပင်လယ်၌ ၎င်း၊ သင့်ကုန်သွယ်ရန်ဥစ္စာတို့သည်လှိုင်းတံပိုးအလယ်၌ ၎င်း၊ ကျိုးပဲ့၍၊ သင့်နှင့်ပါသောသူအပေါင်းတို့သည်ဆုံးရှုံးကြပြီ။ ၃၅ ​ကျွန်းသူ​ကျွန်းသားအပေါင်းတို့သည်သင့်အမှုကြောင့်၊ မိန်းမောတွေဝေ၍ရှင်ဘုရင်တို့သည် မျက်နှာပျက်ကြလျက်ကြက်သီးမွေးညှင်းထကြ၏။ ၃၆ အမျိုးမျိုးသောကုန်သည်တို့သည်သင့်အားကဲ့ရဲ့သံကိုပြုကြ၏။ သင်သည်ကြောက်မက်ဘွယ်ဖြစ်လေပြီတကား။ နောက်တဖန်မပေါ်လာရပါတကားဟုငိုကြွေးမြည်တမ်းကြလိမ့်မည်ဟုမိန့်တော်မူ၏။

၅ (a) စေနိရ Senir သည် အရပ်ဒေသ နာမည်ဖြစ်သည်။